O‘zbekiston o‘smirlar terma jamoasi bugun Osiyo kubogidagi o‘z ishtirokini boshladi. Jamoliddin Rahmatullayev jamoasi 1-turda Yaponiyaga qarshi qiyin uchrashuv o‘tkazdi.

O‘smirlarimiz o‘yin boshidan tashabbusni qo‘lga olib, birinchi raqam ostida o‘ynashga harakat qilishdi. Ammo yaponlarning ilk hujumiyoq gol bilan yakunlandi. Qanotdan havolatib yetkazilgan to‘pni Yutaka Michivaki bosh bilan darvozamizga joylab qo‘ydi.

Keyingi daqiqalarda ham o‘yin surati deyarli o‘zgarmadi: vakillarimiz pozision hujumlar tashkil etishgan bo‘lsa, Yaponiya mustahkam himoyani tashkil qilib, qarshi hujumdan foydalanishga harakat qilishdi. Aytish kerakki, raqib ko‘p hujum tashkil etmagan bo‘lsa-da, ularning hujumlari xavfli ko‘rinish oldi.

Ayniqsa, ikkinchi bo‘lim boshida yaponiyalik forvard yakkama-yakka vaziyatda yo‘llagan zarbasi natijasida to‘p darvozabonimiz va himoyachimizga tegib, to‘rga borib tushmadi.

Issiq havo harorati ham jamoalarga tezkor o‘yin namoyish etishga xalal berdi. Bosh murabbiyimiz ikkinchi bo‘limda amalga oshirgan o‘yinchi almashtirish o‘z samarasini berdi. Bahsning 82-daqiqasida to‘p oldinga chiziqqa yetkazilishi natijasida zaxiradan tushgan Amirbek Saidov himoyachidan qochib ketdi va 14-metrlardan zarba berdi. To‘p olis ustunga tegib, to‘rga borib tushdi — 1:1.

O‘yin so‘ngida yaponlar charchab qolgani bois so‘nggi daqiqalardagi ustunlik biz tomonda bo‘ldi. Ayniqsa, Saidov 90+9-daqiqada g‘alaba to‘pini kiritishi mumkin edi. Ammo u yakkama-yakka vaziyatda xavfli zarba yo‘llashi uchun biroz masofa kamliq qilib qoldi.

Shu tariqa, O‘zbekiston o‘smirlar terma jamoasi Osiyo chempionatini durang bilan boshladi. Jamoamiz keyingi bahsni 20 iyun kuni Hindistonga qarshi o‘tkazadi. O‘yin Toshkent vaqti bilan 17:00da boshlanadi.

U17 Osiyo kubogi. "D" guruhi, 1-tur
Yaponiya - O‘zbekiston - 1:1 (1:0)
Gollar: Yutaka Michivaki (8) — Amirbek Saidov (82)
O‘zbekiston: Sobirov, To‘lqinbekov, O‘ktamov, Laziz Mirzayev, Shukurullayev, Jumatov, Shodiboyev, Karimov, Abdulboriyev, O‘rmonjonov, Abdullayev