Hindiston o‘smirlar terma jamoasi bosh murabbiyi Bibiano Fernandes U17 Osiyo kubogi guruh bosqichi 2-turi doirasida O‘zbekistonga qarshi bo‘lib o‘tgan o‘yin (0:1) borasida o‘z fikrlarini bildirib o‘tdi.

"Yaxshi o‘yin o‘tkazdik. Bizga qiyin bo‘lishini bilardik. Biz bor kuchimiz bilan harakat qildik. Birinchi bo‘limda raqibni to‘xtata oldik. Ikkinchi bo‘limda ham bunga harakat qildik. O‘z shogirdlarim bilan faxrlanaman. Chunki, ular bugun maydonda 100 foiz kuchlarini berishdi. Keyingi o‘yinni intizorlik bilan kutamiz.

O‘ylashimcha, biz yaxshi himoyalandik. O‘tkazib yuborilgan yagona golda omadimiz kelmadi. O‘sha paytda biroz tajavuzkor himoyalanganimizda zarbani qaytarishimiz mumkin edi.

Endi bizda bir ochko bo‘lsa, asosiy raqiblarimiz hisobida 4 ochkodan mavjud. Yaponiyaning qanday kuchga ega ekanini bilamiz. Ular ushbu yosh toifasida musobaqaning amaldagi chempioni hisoblanadi. Ammo futbolda hamma narsa ro‘y berishi mumkin. Biz reja ishlab chiqamiz. Agar g‘alaba qozonsak, keyingi bosqichga chiqishimiz mumkin.

Ushbu Osiyo chempionati futbolchilar uchun yaxshi tajriba bo‘lmoqda. Dastlabki ikki o‘yindan to‘g‘ri xulosa chiqaramiz. O‘rtoqlik o‘yinlari va rasmiy o‘yinlar o‘rtasida farq katta. Biz jamoa sifatida oldinga intilamiz", — dedi Fernandes.