So‘nggi 15 yil ichida futbol maydonida dominantlik qilib kelgan Ronaldu va Messi erasi o‘z yakuniga yetdi. Bu ikki afsona Yevropada endi bo‘y ko‘rsatmaydi. Ularning biri Saudiya Arabistoniga, ikkinchi esa AQSHga yo‘l olgan edi. "Oltin to‘p"ning so‘nggisini qo‘lga kiritgan Karim Benzema ham Ronaldu ortidan O‘rta Sharqqa ravona bo‘ldi. 2018 yilgi g‘olib Modrich esa "Real"da qolganiga qaramasdan, faoliyati oxirlab qolganiga ishora qildi. Shunday ekan, afsonalar davri tugamoqda. 2023 yilgi "Oltin to‘p" yana Messiga nasib etishi kutilmoqda. Argentinalik hujumchi o‘z jamoasi bilan mundial g‘olibiga aylangan edi. Bu tushunarli. Ammo 2024 yil uchun nima deya olamiz? Quyida bir yildan keyingi "Ballon d'Or" da’vogarlari haqida so‘z boradi.
Jud Bellingem – "Real"
Qatardagi Jahon chempionatining yorqin yulduzlaridan biri bo‘lgan Bellingem, futbol tarixidagi uchinchi eng qimmat futbolchiga aylangan edi. U 103 million yevro evaziga "Real" safiga o‘tdi. Afsuski, Angliya terma jamoasi a’zosi "BvB"ni Germaniya chempioniga aylantira olmadi. Ammo u o‘z klubida 19 yoshidayoq sardorlik bog‘ichiga ega chiqdi. O‘tgan mavsumda yarim himoyachi 42 ta o‘yinda maydonga tushib, 14 ta gol va 7 ta assistga mualliflik qilgandi. Bellingem hammani rad etib, Madrid klubiga qo‘shilishni afzal ko‘rdi. Kelajakda buning natijasi namoyon bo‘ladi.
Erling Xoland – "Manchester Siti"
Xoland APL bosh sovrini va turnirning eng yosh futbolchisi nomini birdaniga qo‘lga kiritgan tarixdagi ilk futbolchidir. Norvegiya terma jamoasi a’zosi Messi va Ronalduning eng munosib vorisi sifatida katta maydonga kirib keldi. Xoland Angliyada bir mavsumda eng ko‘p gol urish borasida ham rekordlarni yangilagandi. 22 yoshli hujumchi mavsumni 53 ta uchrashuvda 52 ta gol bilan tugatdi. Shuningdek, u Angliyada so‘nggi 95 yilda, yagona mavsumda 50 tadan ko‘p gol urgan ilk hujumchiga aylandi. Hozirga qadar klub va mamlakat uchun 229 ta gol urishga ulgurgan Xoland, Ronalduning 837 talik rekordini yangilash uchun eng asosiy da’vogardir.
Vinisius Junior – "Real"
O‘tgan mart oyida Karlo Anchelotti Vini Juniorni "Liverpul"ga qarshi bahsdan keyin "dunyodagi eng kuchli futbolchi" deya ta’riflagandi. Braziliyalik hujumchi 2021-2022 yilgi YECHL mavsumida "Manchester Siti" himoyasini parokanda qilib tashladi. U o‘tgan davrda 23 ta gol va 21 ta assist bilan mahsuldorlik bobida Yevropada uchinchi o‘ringa erishgan.
Afsuski, shunday talant, mavsum davomida ko‘plab irqchilik bilan bog‘liq muammolarga duch keldi. Ammo jahon hamjamiyati qarshiligi bilan bunga barham berildi. Hozirda Junior FIFAning irqchilikka qarshi kurash qo‘mitasiga boshchilik qilmoqda.
Kilian Mbappe – "PSJ"
Fransiya terma jamoasi sardori 2017 yilda "PSJ" safiga keladi. U shundan buyon 260 ta o‘yinda 212 gol va 98 ta assist qayd etdi. Mbappe olti yilda 13 ta titul yutishga erishgan. 2018 yilgi mundialda g‘olib chiqqan Fransiya tarkibida Mbappe muhim rol o‘ynaydi. Hatto, u 2022 yilda ham Jahon chempioni bo‘lishi mumkin edi. Ammo finalda qayd etgan xet-trigi, Messi Argentinasini yengishga yetmadi. Afsuski, shunday hujumchi "PSJ"ni tark etishga qaror qilgan. Mbappening niyati – "Real" safiga qo‘shilish. Ammo bu ish oson bo‘lmaydi.
Neymar – "PSJ"
Garchand 31 yosh bo‘lsa ham, Neymarning darajasi hali ham yuqori. Vinger o‘tgan mavsum davomida 35 ta golda ishtirok etdi. Mundialda Xorvatiya darvozasiga gol urish orqali u Pelening Braziliya safidagi rekordiga tenglashib oldi (77 ta). Shunday ekan, Neymardan hali ko‘p narsa kutish mumkin. "Oltin to‘p"ga da’vogarlar ro‘yxatidan uni chiqarmay turamiz.
ISMATOV J.
