“Buxoro” – “Andijon” (0:1) uchrashuvidan keyin buxoroliklar bosh murabbiyi Ulug‘bek Baqoyev o‘rniga yordamchi murabbiyi Mixali Yaremchuk matbuot anjumanida qatnashdi.

— Bugungi o‘yinda yigitlar yaxshi harakat qilishdi va intilishdi. G‘alaba biz uchun juda muhim edi. Futbolchilar qo‘llaridan kelganicha oxirigacha kurashishdi. Barchasi uchun ularga rahmat. Qayerdadir o‘xshadi, qayerdadir o‘xshamadi. Lekin natija bo‘lmadi. O‘yindan-o‘yinga xato va kamchiliklarimizni kamaytirib boryapmiz. Bu qiyin o‘yin edi.

— Yaxshi natijaga erishish uchun qanday muammolarni yengib o‘tish kerak?
— Har qanday jamoada o‘ziga xos tarzda bo‘lgan muammolar kuzatiladi. Buni mashg‘ulotlarda imkon qadar yengib o‘tish kerak. Albatta, kamchiliklarni birdaniga yengib o‘tish qiyin. Bunga ozgina vaqt kerak bo‘ladi. Jamoa va muxlislar xohlagan o‘yinni tashkil qilish uchun ma’lum muddat vaqt talab qiladi.

— Bir qator futbolchilar ketdi. Ikkinchi davra oldidan qanday o‘zgarishlar bo‘ladi?
— Biz bu borada to‘xtamay har bir chiziqni kuchaytirish uchun ishlayapmiz. Bizni qoniqtiradigan va chiziqlarni kuchaytiradigan o‘yinchilarni tarkibga jalb qilamiz, deb o‘ylayman. Bizni o‘ziga xos rejamiz bor edi va shunga qarab o‘yin tashkil qildik.

— Ro‘zimboy Ahmedov maydonga tushmadi. U bir taym o‘ynashi mumkin edi. Ammo uni qo‘yib yubordinglar...
— Bizda iqtidorli yosh futbolchilar bor. Uni o‘rnini bosadigan yigitlar bor. Buxorolik bir qator kuzatayotgan o‘yinchilarimiz mavjud.

— Qanday seleksiya ishlari olib borilyapti?
— Bu sir. Imkon qadar “Buxoro” safida mahalliy o‘yinchilar o‘ynatish harakatidamiz. Kerakli o‘yinchilarni olish va maqsadga erishish uchun samarali ishlarni olib boryapmiz.

“Andijon” matbuot xizmati.