Superliga 13-turidan o‘rin olgan «Nasaf» – OKMK (2:0) uchrashuvidan so‘ng mehmonlar bosh murabbiyi Mirjalol Qosimov o‘z fikrlarini bildirib o‘tdi.

“To‘p bilan muomala qilishda bir biriga munosib bo‘lgan ikki jamoa o‘zaro to‘qnash keldi. Uchrashuvning dastlabki 15 daqiqasini boy berdik. Eshmurodov va Aliqulov burchak zarbalaridan yaxshi foydalanishi haqida ta’kidlagan edim. Xato qildik – gol o‘tkazib yubordik. Ikkinchi bo‘limda ham xuddi shunday bo‘ldi. Shular bellashuv taqdirini hal qildi. Kurashlarga boy bahs guvohi bo‘ldik. Keraksiz holatlarda to‘pni ko‘p bor yo‘qotdik va ikkinchi bo‘limda qarshi hujumni o‘tkazib yubordik.

Bugun boshqacha sxemada maydonga tushgan edik va Siyavash shu sababli zaxirada qoldirildi. Kontsentrasiya etishmadi. Oddiy vaziyatlarda to‘pni yo‘qotdik. «Nasaf» o‘zi kuchli jamoa va bu xatolarimizdan so‘ng ularga yana imkoniyat yaratib berdik.

Sanches jamoadan ketgani yo‘q. Jamoamizda jarohatlar sabab muammolar bor. Rubenda ham, Martinda ham jarohat bor edi”, – dedi Qosimov.