O‘zbekiston o‘smirlar terma jamoasi bosh murabbiyi Jamoliddin Rahmatullayev Saudiya Arabistoniga qarshi o‘yin oldidan matbuot anjumanida ishtirok etdi.
"Avvalambor ushbu bosqichga yetib kelgan barcha jamoalarni tabriklayman. Chorak final o‘yinlari barcha uchun muhim hisoblanadi.
Ushbu o‘yin Jahon chempionati yo‘llanmasini ham taqdim etadi. Shu sababli biz mazkur muhim o‘yinda g‘alaba uchun harakat qilamiz.
Biz ushbu turnirga juda katta motivasiya bilan kelganmiz. Yigitlarda ishtiyoq juda yuqori. O‘yindan o‘yinga jamoa har tomonlama rivojlanib bormoqda, ertaga ishtiyoqqa to‘lib maydonga tushamiz. Bu futbolchilar bizning kelajagimiz. Aytganimdek, ularning o‘sishlari, faoliyatlarida yirik turnirlar katta ahamiyatga ega.
Guruh bosqichi uchrashuvlari yakunlandi, endi esa bor e’tiborimizni ertangi bahsga qaratganmiz. Saudiya Arabistoniga qarshi o‘yinga boshqacha yondashuv bilan tayyorgarlik ko‘rmoqdamiz. Mas’uliyat va sovuqqonlik bilan kerakli natija uchun maydonga tushamiz", – dedi murabbiy.
