Superliganing 13-turidan o‘rin olgan “Neftchi” – “Navbahor” (0:0) uchrashuvidan keyingi matbuot anjumanining ikkinchi qismida mezbonlar bosh murabbiyi Vitaliy Levchenko qatnashib, jurnalistlarning savollariga javob berdi. Quyida “yo‘lbarslar” ustozining o‘yin haqidagi fikrlari e’tiboringizga havola etiladi.

— Bugungi derbi o‘z nomiga yarasha qiziqarli va keskin tarzda o‘tdi. Namangandan ham ancha muxlislar tashrif buyurishdi. Jamoamiz ishqibozlari ham stadionni to‘ldirishdi. Uchrashuv ham shunga yarasha qiziqarli bo‘ldi, faqatgina gollar yetishmadi.

Umar Adhamzoda qulay imkoniyatdan foydalana olmadi. Bu kabi vaziyatlar ko‘p, bizning kamchiligimiz ham shu. Imkoniyatlardan foydalanishda oqsayapmiz.

Chempionlik uchun kurash qiziqarli kechyapti. Jamoalarning saviyasi avvalgidan yuqori. Mana, “Navbahor” ham bugun chempionlik kurashida. Oldida OCHL saralash uchrashuvlari turibdi. Namanganliklarga omad tilayman. Ular chempionlik kurashida ham yaxshi imkoniyatga egalar. Yana bir asosiy nomzod – “Paxtakor” bugun so‘nggi daqiqalarda g‘alaba qozondi. Bu ham hozirgi chempionatimiz ancha kuchayganini bildiradi. Oson raqib va oson o‘yin yo‘q.

Murabbiy sifatida doimiy ravishda stadionimizda bugungidek muxlislar to‘lishini istayman. Albatta, biz ham bunga harakat qilamiz.

Jamoada raqobat bor va bu bizni xursand qilmoqda. Barchada jismoniy toliqish bor va bu tabiiy jarayon. Muhimi, bizda har kim istalgan vaqt maydonga tushib o‘yinni kuchaytira oladi. Raqobat bo‘lishi muhim jarayon.

“Navbahor” matbuot xizmati.