Суперлиганинг 13-туридан ўрин олган “Нефтчи” – “Навбаҳор” (0:0) учрашувидан кейинги матбуот анжуманининг иккинчи қисмида мезбонлар бош мураббийи Виталий Левченко қатнашиб, журналистларнинг саволларига жавоб берди. Қуйида “йўлбарслар” устозининг ўйин ҳақидаги фикрлари эътиборингизга ҳавола этилади.

— Бугунги дерби ўз номига яраша қизиқарли ва кескин тарзда ўтди. Намангандан ҳам анча мухлислар ташриф буюришди. Жамоамиз ишқибозлари ҳам стадионни тўлдиришди. Учрашув ҳам шунга яраша қизиқарли бўлди, фақатгина голлар етишмади.

Умар Адҳамзода қулай имкониятдан фойдалана олмади. Бу каби вазиятлар кўп, бизнинг камчилигимиз ҳам шу. Имкониятлардан фойдаланишда оқсаяпмиз.

Чемпионлик учун кураш қизиқарли кечяпти. Жамоаларнинг савияси аввалгидан юқори. Мана, “Навбаҳор” ҳам бугун чемпионлик курашида. Олдида ОЧЛ саралаш учрашувлари турибди. Наманганликларга омад тилайман. Улар чемпионлик курашида ҳам яхши имкониятга эгалар. Яна бир асосий номзод – “Пахтакор” бугун сўнгги дақиқаларда ғалаба қозонди. Бу ҳам ҳозирги чемпионатимиз анча кучайганини билдиради. Осон рақиб ва осон ўйин йўқ.

Мураббий сифатида доимий равишда стадионимизда бугунгидек мухлислар тўлишини истайман. Албатта, биз ҳам бунга ҳаракат қиламиз.

Жамоада рақобат бор ва бу бизни хурсанд қилмоқда. Барчада жисмоний толиқиш бор ва бу табиий жараён. Муҳими, бизда ҳар ким исталган вақт майдонга тушиб ўйинни кучайтира олади. Рақобат бўлиши муҳим жараён.

“Навбаҳор” матбуот хизмати.