Saudiya Arabistoni o‘smirlar terma jamoasi bosh murabbiyi Abdulvahob Nosir al-Harbiy U17 Osiyo kubogi chorak final bosqichi doirasida bo‘lib o‘tadigan O‘zbekistonga qarshi o‘yin oldidan o‘z fikrlari bilan o‘rtoqlashdi.

"Guruh bosqichida dastlabki 2 ta o‘yinda g‘alaba qozonib, chorak final yo‘llanmasini hal qilib olganimizdan keyin uchinchi turdi tarkib borasida rotasiya qilish imkoniyatiga ega bo‘ldik.

Ba’zi o‘yinchilarga dam berib, qolganlarga o‘yin amaliyoti berganimizdan keyin butun jamoada o‘ziga bo‘lgan ishonch oshdi. Boisi, qaysidir futbolchining o‘yini o‘xshamasa, boshqasi uning o‘rnini bemalol to‘ldira olishi mumkin.

Bu futbolchilar borasida uzoq maqsadli rejalarimiz bor. Gap faqat U17 jahon chempionatida emas, biz keyingi yosh toifasidagi jamoalarimiz uchun iqtidorli futbolchilarni topishni va tarbiyalashni maqsad qilganmiz.

Biz O‘zbekistonga qarshi o‘rtoqlik uchrashuvini o‘tkazganmiz. Ularning o‘yin uslubini bilamiz. Ammo unutmaslik kerakki, ular ham bizning uslubimizni biladi. Uchrashuvdan uchrashuvga o‘yinimiz yaxshilanib boryapti. Ammo hali o‘zimizning eng yuqori cho‘qqimizga chiqmadik. Ijobiy natijaga erishishga harakat qilamiz", — dedi saudiyalik murabbiy.

Eslatib o‘tamiz, Saudiya Arabistoni va O‘zbekiston U17 terma jamoalari o‘rtasidagi o‘yi bugun Toshkent vaqti bilan 19:00da start oladi.