Саудия Арабистони ўсмирлар терма жамоаси бош мураббийи Абдулваҳоб Носир ал-Ҳарбий U17 Осиё кубоги чорак финал босқичи доирасида бўлиб ўтадиган Ўзбекистонга қарши ўйин олдидан ўз фикрлари билан ўртоқлашди.

"Гуруҳ босқичида дастлабки 2 та ўйинда ғалаба қозониб, чорак финал йўлланмасини ҳал қилиб олганимиздан кейин учинчи турди таркиб борасида ротация қилиш имкониятига эга бўлдик.

Баъзи ўйинчиларга дам бериб, қолганларга ўйин амалиёти берганимиздан кейин бутун жамоада ўзига бўлган ишонч ошди. Боиси, қайсидир футболчининг ўйини ўхшамаса, бошқаси унинг ўрнини бемалол тўлдира олиши мумкин.

Бу футболчилар борасида узоқ мақсадли режаларимиз бор. Гап фақат U17 жаҳон чемпионатида эмас, биз кейинги ёш тоифасидаги жамоаларимиз учун иқтидорли футболчиларни топишни ва тарбиялашни мақсад қилганмиз.

Биз Ўзбекистонга қарши ўртоқлик учрашувини ўтказганмиз. Уларнинг ўйин услубини биламиз. Аммо унутмаслик керакки, улар ҳам бизнинг услубимизни билади. Учрашувдан учрашувга ўйинимиз яхшиланиб боряпти. Аммо ҳали ўзимизнинг энг юқори чўққимизга чиқмадик. Ижобий натижага эришишга ҳаракат қиламиз", — деди саудиялик мураббий.

Эслатиб ўтамиз, Саудия Арабистони ва Ўзбекистон U17 терма жамоалари ўртасидаги ўйи бугун Тошкент вақти билан 19:00да старт олади.