Tailandda o‘tkazilayotgan o‘smirlar o‘rtasidagi Osiyo chempionatida chorak final bahslari yakuniga yetib, yarim finalchilar nomi ma’lum bo‘ldi. Chorak final bosqichining so‘nggi o‘yini Saudiya Arabistoni va O‘zbekiston U17 terma jamoalari o‘rtasida kechdi.

O‘yinning dastlabki daqiqalarida yigitlarimiz 2ta xavfli vaziyatni yuzaga keltirishdi. Dastlab Mirzayev qanotdan belgilangan jarima zarbasini bevosita darvoza tomon yo‘lladi. Raqib posboni to‘sin ostiga kirayotgan to‘pni yuqoriga urib yubordi. Oradan ko‘p o‘tmasdan futbolchilarimiz  to‘p bilan saudiyaliklar jarima maydoniga kirib borishdi. Vakillarimizdan biri yaqin masofadan darvozaga aniq zarba bera olmadi — to‘p ustun yonidan o‘tib ketdi.

Bahsning 18-daqiqasida esa Saudiya oddiy vaziyatda penalti ishlashga muvaffaq bo‘ldi. Himoyachimiz Ozod O‘ktamov shart bo‘lmagan joyda jarima maydonimiz ichida raqib futbolchisini ortdan itarib yiqitdi. Darvozabonimiz Muhammadyusuf Sobirov raqib hujumchisi Navof al-Bishriy tomonidan yo‘llangan penaltini qaytarib, qahramonlik namoyish etdi. Posbonimiz birinchi bo‘limda saudiyaliklarning yana bir hujumini bartaraf etdi.

Bizning hujumchimiz Shodiyor Shodiboyevda ikkita yaxshi imkoniyat bo‘ldi — u ikki marta raqib darvozaboni bilan yakkama-yakka vaziyatga chiqdi. Birinchi bo‘limdagi vaziyatda himoyachi zarba yo‘liga g‘ov bo‘lgan bo‘lsa, ikkinchi bo‘lim boshida Shodiyor zarba berguncha himoyachilar undan to‘pni o‘g‘irlab ketishdi.

O‘yinning so‘nggi daqiqalari esa Jamoliddin Rahmatullayev shogirdlari uchun omadli keldi. Dastlab 78-daqiqada Ollabergan Karimov Laziz Mirzayev bilan "devor" o‘ynab qanotdan jarima maydoniga kirdi. U so‘nggi chiziq yonida darvoza oldiga uzatma berayotganida to‘p saudiyalik posboni Mahmud al-Burayhning oyog‘iga tegib, to‘rga borib tushdi.

Uchrashuvning 84-daqiqasida esa O‘zbekiston burchakdan to‘pni o‘yinga kiritdi. Amirbek Saidov bosh bilan to‘p yo‘nalishini o‘zgartirdi. Himoyachimiz Dilshod Abdullayev esa oyog‘i to‘pni darvozaga burib yubordi — 0:2.

O‘smirlarimiz so‘nggi daqiqalarad ishonchli harakat qilib, raqibning xavfli vaziyat yaratishiga imkon berishmadi.

Shu tariqa, O‘zbekiston U17 terma jamoasi Indoneziyada o‘tadigan jahon chempionati yo‘llanmasini qo‘lga kiritdi. O‘smirlarimiz Osiyo kubogining yarim final bahsini 29 iyun kuni Janubiy Koreyaga qarshi o‘tkazadi.

U17 Osiyo kubogi. Chorak final
SAUDIYA ARABISTONI - O‘ZBEKISTON - 0:2 (0:1)
Gollar: Mahmud al-Burayh (78-avtogol), Dilshod Abdullayev (84)
O‘zbekiston: 21.Muhammadyusuf Sobirov, 5.Azizbek To‘lqinbekov, 6.Ozod O‘ktamov, 7.Laziz Mirzayev (S), 8.Behruz Shukurullayev, 13.Behruz Jumatov, 14.SHodiyor Shodiboyev, 16.Muhammadali Raimov, 17.Ollabergan Karimov, 19.SHerzod Abdulboriyev, 23.Dilshod Abdullayev