"Tottenxem" bu yozda Xarri Keynni sotmaydi.
ESPN xabariga ko‘ra, klub hujumchini joriy transfer oynasi vaqtida transferga tayyor emasligi haqida ogohlantirgan.
Avvalroq, "Tottenxem" "Bavariya"ning bonuslarni hisobga olmaganda 70 million yevrolik taklifini rad etgani xabar qilingandi. Biroq ESPN'ning ta’kidlashicha, "shporlar" "Bavariya"ning Keynga qiziqishidan xabardor bo‘lishiga qaramay, rasmiy taklif olmagan.
"Manchester Yunayted" ham Keynning holatini kuzatib bormoqda, ammo bu transfer dargumon ko‘rinadi va hujumchi o‘tishni talab qilsagina amalga oshishi mumkin.
Xarri Keynning "Tottenxem" bilan shartnomasi 2024 yilning iyunigacha amal qiladi. Angliyalik futbolchi o‘tgan mavsumda "shporlar" safida APLda 38 o‘yinda maydonga tushib, 30 ta gol urdi.