FIFA ekspertlari hamda O‘FA birinchi vise-prezidenti Ravshan Irmatov va futzalni rivojlantirish qo‘mitasi raisi Jahongir Usmonov boshchiligidagi maxus ishchi guruh tomonidan futzal bo‘yicha Jahon chempionati bo‘lib o‘tadigan hududlarni o‘rganish ishlari olib borilayotganidan xabaringiz bor.

Toshkent shahri, Andijon, Farg‘ona, Samarqand viloyatidan so‘ng ishchi guruh Buxoroning futzal infratuzilmasini o‘rganib chiqdi.

FIFA va O‘FA vakillari “Universal Sport Saroyi” bilan tanishdilar. Majmua maydoni, jamoalarning kiyim almashtirish xonalari, media markaz, tashkiliy-ma’muriy obektlarni jahon chempionati standartiga moslash bo‘yicha fikrlar almashildi. Muxlislar va tashrif buyuruvchilar uchun qulayliklar yaratish yuzasidan rejalar belgilab olindi.

Shuningdek, delegasiya vakillari viloyatda joylashgan mehmonxonalar, Olimpiya va paralimpiya sport turlariga mo‘ljallangan kompleks hamda mashg‘ulot zallarini ko‘zdan kechirdi.

Shu bilan futzal bo‘yicha 2024 yilgi Jahon chempionati oldidan o‘tkazilgan dastlabki inspeksiya ishlari yakunlandi. Inspeksiya xulosalari ertaga - 30 iyun kuni FIFA va O‘FA vakillari ishtirokidagi matbuot anjumanida taqdim etiladi. Anjuman soat 10:45 da O‘FA majlislar zalida boshlanadi.