So‘nggi xabarlarga qaraganda, "Bavariya" Xarri Keyn xaridiga juda ham yaqin turibdi. Qayd etilishicha, Keyn va nemis giganti o‘rtasida allaqachon shaxsiy shartlar kelishib olingan. Dastlabki taklif rad etilganidan keyin, "Bavariya" hujumchi uchun 80 million funt taklif etishga tayyorgarlik ko‘rmoqda. Ha, "Tottenxem" rahbari Daniel Levi Keynni sotishni istamayapti. Shu sababli muzokaralarda qaysarlik qilmoqda. Ammo bu myunxenliklarni yo‘ldan qaytara olmaydi.
Nemis jurnalisti, BILD muxbiri Kristian Falkning ta’kidlashicha, Bundesliga chempionlari bu masalani hal qilishiga ishonmoqda. Ayrim manbalarga ko‘ra, "Bavariya"ga Keynni yana bir yil, u erkin agentga aylanguniga qadar kutish kerakligi taklif qilingan. Ammo klubga hujumchi zarur va bunday qilib bo‘lmaydi. Falk bu borada BBC radiosiga shunday dedi: "Tomas Tuxel "Bavariya"da xuddi Angliyadagi kabi ishlamoqda. Ya’ni, aynan u jamoaga kim kelishi va ketishini hal qiladi. Tuxel Keynning oilasi bilan ham gaplashgan. Shunday ekan, "Bavariya" Keynning xohishlarini aniq bilmaganida, taklif yubormagan bo‘lardi. Futbolchi avvaldan Daniel Levi bilan kelishib olgan edi: agar Keynni qiziqtiradigan taklif berilsa, unga ketishga ruxsat berilishi kerak. Hozir, u aynan ketishni istayapti. Negaki, "Tottenxem"da sovrin yutishning imkoni bo‘lmadi. Agarda u "Bavariya"ga borsa, hech bo‘lmaganda, yiliga bitta titul kafolatlanadi. Keyn shu sababdan Germaniya sari otlangan. Ha, futbolchi hozir Londonda qolsa ham, "Bavariya" Keynni yana bir yil kutishi mumkin. Ammo unda "Tottenxem" uni tekinga qo‘yib yuborishiga tӯg‘ri keladi Hozir qaror qabul qilish kerak bo‘lgan payt: klub rahbarlari 80 million funtni olib, uni sotadimi yoki yana bir yilga saqlab qolib, keyin tekinga qo‘yib yuboradimi? Mana shu o‘ta muhim, ayni paytda "shporlar" uchun og‘ir masaladir".
Levi shunday ahvolda turgan bo‘lishiga qaramasdan, Keynni qo‘yib yuborgisi kelmayapti. U hujumchini qoldirishga, yangi shartnomaga imzo chekishiga umid qilmoqda.
"Bavariya" allaqachon o‘ziga Levandovskini o‘rnini bosadigan vakil kerak ekanini anglab yetgan. Yevropa sahnida kurash olib borish uchun bu juda ham muhim sanaladi.
Xarri Keyn uchun "Real" ham da’vogarlik qilayotgandi. Ammo madridliklar allaqachon kurashdan chiqib bo‘lgan. "Manchester Yunayted" esa ayni damda hujum chizig‘idan boshqa hududlarni kuchaytirish bilan ovvora. Shunday vaziyatda, "Bavariya" kerakli qadamlarni vaqtida tashladi. Tez orada Xarri Keyn ularniki bo‘ladi.
ISMATOV J.