Senegallik hujumchi Nikolas Jekson "Vilyarreal"dan "Chelsi"ga o‘tishi haqida fikr bildirdi.

Futbolchi "Chelsi"dek katta klubga o‘tishni juda xohlaganini tan oldi. Jeksonning so‘zlariga ko‘ra, London klubiga o‘tish imkoniyati paydo bo‘lganida, u tanloviga shubha qilmagan.

"Men katta jamoaga qo‘shilishni xohlardim va "Chelsi" dunyodagi eng yaxshi jamoalardan biri va men ularni bolaligimdan kuzatib kelaman. Demba Ba, Didye Drogba, Nikola Anelkanining o‘yinlarini tomosha qilganman. Bunday jamoada o‘ynash mening orzum bo‘lgan", - dedi Jekson "Chelsi" rasmiy saytiga.

Avvalroq, "Chelsi" 22 yoshli hujumchi uchun 37 million yevro to‘lashi haqida xabarlar tarqalgan edi. Eslatib o‘tamiz, Transfermarkt portali Senegal terma jamoasi futbolchisini 30 millionga baholamoqda. Jeksonning London klubi bilan shartnomasi 2031 yilgacha mo‘ljallangan.

Hujumchi o‘tgan mavsumda "Vilyarreal" safida 36 ta o‘yinda maydonga tushib, 13 ta gol urgan va 5 ta golga assistentlik qilgan.