"Chelsi" yarim himoyachisi Meyson Maunt tez orada "Manchester Yunayted"ning yangi futbolchisi sifatida tanishtiriladi.
24 yoshli futbolchi allaqachon videomurojaatini e’lon qilib, "aristokratlar" safidagi faoliyatini yakunlaganini va "ko‘klar" muxlislari bilan xayrlashgani haqida ma’lum qilgan. Nufuzli insayder Fabrisio Romanoning so‘zlariga ko‘ra, "Manchester Yunayted" chorshanba kuni ertalab Mauntning kelishuvini rasman tasdiqlaydi.
Meyson Maunt 2005 yildan beri "Chelsi" tizimida harakat qilib kelayotgandi. Yarim himoyachi Niderlandiyaning "Vitess" va Angliyaning "Derbi Kaunti" klublariga ijaraga berilganidan tashqari, o‘z klubini tark etmadi. Umuman olganda, futbolchi barcha musobaqalarda "Chelsi" asosiy jamoasi safida 195 o‘yinda maydonga tushib, 33 ta gol va 37 ta golli uzatmani amalga oshirgan.
