"Челси" ярим ҳимоячиси Мэйсон Маунт тез орада "Манчестер Юнайтед"нинг янги футболчиси сифатида таништирилади.
24 ёшли футболчи аллақачон видеомурожаатини эълон қилиб, "аристократлар" сафидаги фаолиятини якунлаганини ва "кўклар" мухлислари билан хайрлашгани ҳақида маълум қилган. Нуфузли инсайдер Фабрицио Романонинг сўзларига кўра, "Манчестер Юнайтед" чоршанба куни эрталаб Маунтнинг келишувини расман тасдиқлайди.
Мэйсон Маунт 2005 йилдан бери "Челси" тизимида ҳаракат қилиб келаётганди. Ярим ҳимоячи Нидерландиянинг "Витесс" ва Англиянинг "Дерби Каунти" клубларига ижарага берилганидан ташқари, ўз клубини тарк этмади. Умуман олганда, футболчи барча мусобақаларда "Челси" асосий жамоаси сафида 195 ўйинда майдонга тушиб, 33 та гол ва 37 та голли узатмани амалга оширган.
