Dunyoning eng qimmat futbolchilari odatda Yevropada harakat qilishadi. "Real", "PSJ", "Manchester Siti", "Barselona"...
Bu ro‘yxatni uzoq davom ettirish mumkin. Ammo futboldagi hayot faqatgina Yevropa va kuchli beshlik chempionatlaridan iborat emas. Masalan, oxirgi paytlarda Portugaliya va Niderlandiya milliy ligalarining saviyasi ancha o‘sdi, u yerdan ko‘plab talantlar yetishib chiqmoqda. Lionel Messining MLS'ga ketishi ham bejiz emas. Amerikada ham futbol rivojlanmoqda. Oxirgi paytda Saudiya Arabistoni futbolda katta inqilob yasashga intilmoqda. Ronalduning O‘rta Sharqda o‘ynab yurgan va boshqa ko‘plab mega-yulduzlarning sharq tomon oqimi, shudan dalolat beradi. Xo‘sh, top-5 ligalarda harakat qilmaydigan yulduzlar va ularning eng qimmatlari kimlar? Quyida shu savolga javob topasiz.
10. Pedru Gonsalvesh – 32 million yevro
"Sporting" o‘tgan mavsumda ajoyib harakat qildi. Bu jamoa Yevropa ligasida "Arsenal"ni mag‘lub etgandi. Klubning eng yorqin vakili esa Gonsalvesh bo‘ldi. 24 yoshli yarim himoyachi fantastik darajaga ega. Shu sabab unga APL gigantlari qiziqmoqda.
9. Lionel Messi – 35 million yevro
Messi haqida ortiqcha gapirishning xojati yo‘q deb hisoblaymiz. Afsona o‘zi uchun qaror qabul qildi va Yevropani tark etdi. U MLS'da o‘zini urintirmasdan yursa ham bo‘laveradi. Afsuski, bu ro‘yxatga Messining azaliy raqibi bo‘lgan Ronaldu kira olmadi.
8. Otavio – 35 million yevro
Otavio 2014 yildan beri "Portu" sharafini himoya qilib keladi. Ammo yaqin-yaqindan boshlab yarim himoyachi ko‘zga ko‘rinishni boshladi. Shu sababdan 28 yoshli futbolchiga Saudiya Arabistonidan jiddiy takliflar kelmoqda.
7. Ibrahim Sangare – 35 million yevro
Sangarening yurti so‘nggi ikkita mundialda qatnashmadi. Ammo "PSV"dan ivuarlik talantlar chiqishda davom etmoqda. Bu terma jamoa hozir yuqori darajadagi yarim himoyaga ega. Seko Fofana, Frank Kessie va Sangare uchligiga istalgan terma jamoa havas qiladi. Ularning hammasi "PSV"da porlagan edi.
6. Edson Alvares – 35 million yevro
"Ayaks" uchun o‘tgan mavsum biroz omadsiz kechdi. Shunga qaramay, jamoadagi ayrim nomlar yaxshi harakat qildi. Shulardan biri Edson Alvaresdir. Meksika terma jamoasi a’zosi yarim himoyada muvozanatni ushlab turishda katta tajribaga ega. Shy sabab u tez orada Bundesligaga yo‘l oladi.
5. Orkun Kokchu – 35 million yevro
"Benfika"da yashirin iste’dodlarni topish va ularni tarbiyalash borasida boy tajriba bor. Shu sabab Lissabon klubi "Feyenoord"dan Kokchuni 25 million funtga sotib oldi. 22 yoshli futbolchi Niderlandiya chempioni sifatida Portugaliyaga keldi.
4. Ruben Nevesh – 40 million yevro
Nevesh hali Yevropada o‘ynashi mumkin edi. Unga "Arsenal", "Barselona" va "MYU" kabi klublar qiziqish bildirgan. Afsuski, portugaliyalik yarim himoyachi o‘z karyerasini arablar puliga almashtirib yubordi.
3. Muhammad Kudus – 40 million yevro
So‘nggi jahon chempionatida porlagan yulduzlardan biri Kudus bo‘ldi. U Gana bilan 3 ta bahsda 2 ta golga mualliflik qilgandi. 22 yoshli yarim himoyachiga "Brayton" va "MYU" jiddiy qiziqish bilan qaramoqda. Albatta, APLga kelish, futbolchi uchun katta qadam bo‘ladi.
2. Xavi Simons – 40 million yevro
Simons "PSV"da yorib chiqqan nomlardan biriga aylandi. U o‘z jamoasini Erdiviziya orqali YECHLga olib chiqdi. Hujumchi yosh bo‘lishiga qaramay, aqlli, texnikali va jasoratli. "PSJ" Simonsni 6 million funtga qayta sotib olish huquqiga ega.
1. Diyegu Koshta – 45 million yevro
Koshta kuchli beshlikdan tashqaridagi eng qimmat futbolchi nomiga ega chiqdi. U Portugaliya terma jamoasining asosiy darvozaboni sanaladi. 23 yoshli posbon xizmatlariga "MYU" va "Chelsi" qiziqish bildirgan. "Portu" esa uni 75 million yevroga baholamoqda.
ISMATOV J.
