Shaxmat bo‘yicha Aimchess Rapid onlayn turnirining to‘rtinchi bosqichi 10 iyul, dushanba kuni start oldi. Ushbu musobaqaning 1-divizionida Nodirbek Abdusattorov kecha AQSHlik So Uesliga qarshi dona surdi.

Dastlabki 2 partiyada duranglar qayd etilgan bo‘lsa, uchinchi partiyada Abdusattorov oq donada o‘ynab, yutqazib qo‘ydi. Hamyurtimiz vaziyatdan chiqib ketish uchun so‘nggi partiyada qora donalarda o‘ynab g‘alaba qozonishi talab etilardi. Bu partiyaning 45-yurishida Nodirbek g‘alaba keltirishi mumkin bo‘lgan yagona yo‘lni topa oldi. U o‘z Ruhini qurbon qilish evaziga piyodasining Farzinga chiqishini ta’minladi. Natijada Uesli taslim bo‘ldi.

Hamyurtimiz hal qiluvchi beshinchi partiyada esa oq donalarda o‘ynab, 29-yurishda raqibini mot qildi. Uesli 19-yurishda o‘zbek shaxmatchisining piyodasini urib olib, qo‘pol xatoga yo‘l qo‘ydi. Vatandoshimiz uning bu xatosini kechirmadi va o‘yinni g‘alabagacha olib bordi.

Nodirbek Abdusattorov yarim finalda Levon Aronian (AQSH, 2743)ga qarshi bahs yuritadi. Uchrashuv Toshkent vaqti bilan soat 20:00 da boshlanadi.