Xarri Keyn APLdagi eng yaxshi haq to‘lanadigan futbolchilardan biriga aylanadi. Bu narsa amalga oshishi uchun hujumchi "shporlar" taklif qiladigan shartnomaga rozi bo‘lishi kerak. U yangi tayinlangan murabbiy Angelos Postekoglu bilan ko‘rishib, kelajagini muhokama qilib oladi. Agarda Daniel Levi qaysarligini qo‘ymay, Keynni jamoada olib qoladigan bo‘lsa, bir yildan keyin uni yo‘qotishi mumkin. Ammo bu vaziyatda futbolchi yangi shartnomaga ko‘nmasligi kerak. Hozir aynan mana shu masala kun tartibida turibdi. "Tottenxem" rahbariyati qanday bo‘lmasin, Keynni yangi bitim tuzishga ko‘ndirmoqchi.

Angliya terma jamoasi sardori yangi klubga o‘tishga qattiq tirishgan. Ammo Daniel Levi bu harakatlarni pul bilan to‘xtatish mumkin deb hisoblaydi. U Xarri Keynga haftalik 400 ming funt maosh taklif etadi. Afsuski, bu harakatlar besamar ketishi aniq. Negaki, Keynning ketish haqida o‘ylay boshlashi ortida iqtisodiy motivlar mavjud emas. Hujumchi sovrinlar yutishni istaydi.
Avvalroq "Tottenxem" ustozi Angelos Postekoglu Keyn kelajagi borasida aniq ma’lumotga ega emasligini ta’kidlagan edi. Bu esa ketish niyati jiddiy ekanidan dalolat beradi.

"Bavariya" Keyn uchun asosiy da’vogar sanaladi. Ikki o‘rtada shaxsiy shartlar borasida muammo yo‘qligi aytiladi. Hattoki, myunxenliklar bosh murabbiyi Tomas Tuxel Londonda Keyn bilan uchrashgan ham edi. Bu narsa Daniel Levining g‘azabini qo‘zg‘agan. Shu sababli u "Bavariya"dan keladigan har qanday taklifni rad etishga harakat qilmoqda. Masalan, 60 million va 70 million funtga teng ikki taklif qabul qilinmadi. Bu bejiz emas, albatta.
Agarda "Tottenxem" o‘z maqsadiga erishib, Keynni olib qolsa, futbolchi eng ko‘p maosh oladigan APLdagi ikkinchi yulduzga aylanadi. Ayni damda maosh borasidagi yetakchilik Erling Xolandga tegishlidir. U haftasiga 865 ming funt oladi. Keyn ushbu yangi bitimi orqali Muhammad Saloh va Kevin De Bryuyneni ortda qoldirishi mumkin (385 ming funt).

ISMATOV J.