Stiven Jerrard Saudiya Arabistonidagi yangi ishida yiliga 15.2 million funt maosh olmoqda. Bu orqali "Liverpul" afsonasi dunyoning eng yaxshi haq to‘lanadigan murabbiyidan biriga aylandi. Soliqlarni hisobga olmaganda, Jerrard hozirda yiliga 20 million dollar ishlab topadigan mutaxassisga aylandi. Bu miqdor "Liverpul" bosh murabbiyi Yurgan Kloppnikidan ozgina kamroqdir.

Dunyo futbolida, shuningdek, faqatgina "Ateltiko" ustozi Diyego Simeone va "Manchester Siti"dagi daho Pep Gvardiolagina Jerrarddan ko‘p maosh oladigan murabbiylar sanaladi. 20 millionli katta summa sobiq "Reynjers" va "Aston Villa" murabbiyini O‘rta Sharqqa ketishga ko‘ndirgandi. U ayni damda mersisaydliklar sardori Jordan Xendersonni ham o‘zi bilan ishlashga ko‘ndirdi. 33 yoshli futbolchi "Al-Ittifoq"da haftasiga 700 ming funt maosh olishi ko‘zda tutilgan. Qolaversa, "Kristal Pelas" safida ketgan Vilfrid Zaa ham saudiyaliklar radarida turgan yana bir nom hisoblanadi. Hujumchi hozirga qadar arab klubi bilan to‘laqonli kelishuvga erisha olgani yo‘q. Shunga qaramay, katta taklif uni ham o‘z domiga tortmasdan qolmaydi.

"Al-Ittifoq" Saudiya Arabistonining kattaligi bo‘yicha to‘rtinchi shahri bo‘lgan Dammamda joylashgan klubdir. Yevropadan keladigan futbolchilar uchun bu mamlakatda yashash oson bo‘lmaydi. Negaki, Saudiyada spirtli ichimliklar savdosi butunlay ta’qiqlangan. Ammo erkinlik istaganlar uchun mintaqadagi eng liberal davlat bo‘lgan Bahrayn o‘z bag‘rini ochadi. Dammam shahri esa Bahrayndan bor-yo‘g‘i 70 daqiqalik masofada joylashgan. Bu orqali Jerrard o‘zi uchun istagan futbolchini olib kelishi mumkin. Negaki, ular konservativ hayot tarzida yashaydigan davlatda faoliyat yuritsa ham, dam olish uchun bemalol 50 mil naridagi Bahraynga borib kela oladi.
Ma’lumot o‘rnida shuni ham eslatib o‘tish kerakki, Saudiya jamoat sarmoyadorlik fondining pullari bilan Yevropaning ko‘plab yulduzlari sotib olinmoqda. Bu esa, o‘z navbatida yevrofutbolga xavf solishi mumkin.

ISMATOV J.