"Manchester Yunayted" Andre Onanadan keyin Rasmus Xyoylunnga qiziqish bildirmoqda.
Avvalroq "mankunianliklar" kamerunlik darvozabon bilan "5+1" sxemasi bo‘yicha shartnoma borasida kelishib olgani ma’lum bo‘lgandi. U "Inter"dan 50 million yevro va bonuslar evaziga keladi.
"Manchester Yunayted" kelishuvdan so‘ng "Atalanta" hujumchisi Xyoylunni sotib olishga e’tibor qaratadi, deb xabar beradi The Guardian nashri. Daniyalik futbolchi uchun hozircha rasmiy takliflar bo‘lgani yo‘q, ammo bergamoliklar 70 million yevro atrofida mablag‘ so‘rashi kutilmoqda.
"Manchester Yunayted" "Fiorentina" yarim himoyachisi Sofyan Amrabatga ham qiziqish bildirmoqda, biroq bu pozisiyani mustahkamlash darvozabon va hujumchi sotib olishdan ko‘ra ustuvor vazifa emas. Agar Fred va Donni van de Bek ketsa, bu o‘ringa Sofyan bilan shartnoma imzolanadi.
Onana bilan shartnoma imzolanishi bilan "Manchester Yunayted" Din Xendersonga klubni tark etishiga va "Nottingem Forest" bilan muzokara olib borishiga ruxsat berishi kutilmoqda.
