«Bir odamni 30 yil yediring, ichiring, kiyintiring, u esa sizni 3 kunda unutadi» - xonim o‘g‘lining sobiq turmush o‘rtog‘ini faylasuflarga xos kuchli sitata bilan qattiq tanqid qildi. Aytish joiz, Dani Alveshga hamon 12 yillik qamoq jazosi xavf solmoqda. Eslatma, Barselona tungi klublaridan biridagi zo‘rlash jinoyatida ayblanayotgan futbolchi yanvar oyidan buyon hibsda...

Eng yaxshi davrini «Barselona»ga bag‘ishlagan Dani Alvesh qamoqxonada turib, ketma-ket intervyu berayotgan bir pallada uning sobiq rafiqasi Joana Sans o‘zini mutlaqo chetga olmoqda, yuz bergan voqeliklarga nisbatan qandaydir munosabat bildirishdan tiyilmoqda: «Bo‘ldi, chekinaman. Dani gapiraversin. Xohlasa, tan olsin, xohlasa, rad etsin. Endi unga bog‘liq ishlar haqida hech narsa bilishni istamayman». Joananing ushbu pozisiyasi Lusiya Alvesh xonimga aslo yoqmadi, albatta. Har holda, braziliyalik himoyachining onasi ijtimoiy tarmoqlar orqali darhol javob qaytardi model rolida ancha tanilgan sobiq keliniga. To‘g‘risi, hattoki, Zlatan Ibragimovich ham bu qadar rang-barang va o‘tkir iqtibos keltirolmasmidi...? «Agar oddiy itni 3 kun boqsangiz, u sizni 30 yil eslab qoladi. Agar bir odamni 30 yil yedirsangiz, ichirsangiz, kiyintirsangiz, u sizni 3 kunda unutadi...», - deb yozdi Lusiya Alvesh. Chindan ham, o‘ta faylasufona, o‘tkir va «achchiq« iboralar yig‘indisi.

To‘g‘ri, Danining onasi ushbu «nish» kimga qaratilganini ochiqlamagan, ammo bu Joananing bayonotiga munosabat ekanligini fahmlash uchun dono bo‘lish shart emas. Diario Sport nashrida El Periodico xabariga tayanib yozilishicha, Dani Alvesh ishi bo‘yicha hukm oktyabr yoki noyabrda e’lon qilinadi. Hozircha futbolchining sobiq turmush o‘rtog‘i betaraflik taktikasini tanlagan ko‘rinadi: ortiqcha izohlardan qochish va sud hukmini kutish... 

 A.ABDUVALIXO‘JAYEVtayyorladi