Bundan atigi bir necha kun avval «Manchester Siti»ning YECHLdagi dastlabki zafarini ta’minlagan yarim himoyachi «Barselona»ga o‘tdi.
Ha, oxirgi 10 yil ichidagi eng yaxshi yarim himoyachilar safidan joy olgan Ilkay Gyundogan o‘z faoliyatini Ispaniyaning amaldagi chempioni tarkibida davom ettirishga qaror qildi. Uni yaxshi bilmaydigan futbol muxlislari quyidagi material orqali futbolchiga oid 10ta fakt bilan tanishib olishlari mumkin.
1. Ilkay Gyundogan - turklar avlodidan chiqqan Germaniya fuqarosi. Uning ota-onasi turkiyaliklar, biroq Ilkay 1990 yilning 24 oktyabrida Gelzenkirxen shahrida tavallud topdi. U 2011 yildan beri xalqaro arenalarda Germaniya sharafini himoya qilib kelmoqda, 2 martadan jahon va Yevropa chempionatlarida ishtirok etdi.
2. Kataloniya grandi safiga o‘tish bilan Gyundogan «Barselona»da to‘p surgan 18-germaniyalik futbolchi maqomiga ega bo‘ldi. Ularning 11 nafari 1915 yilgacha o‘ynagan futbolchilar, qolganlari 2014 yildan keyin kelishgan. Kevin-Prins Boateng Germaniyadan tashqari, Gana fuqaroligini ham olgan.
3. Professional futbolda Ilkay Ikkinchi Bundesliganing «Nyurnberg» jamoasida nishonlagan va jamoaning Birinchi Bundesligaga ko‘tarilishiga yordam bergan. O‘zining Bundesligadagi dastlabki golini Gyundogan «Bavariya» darvozasiga urgan. Lekin u hozir ham «Nyurnberg» muxlisi.
4. Gyundogan hozir 32 yoshda, u YECHLning 3ta finalida maydonga tushgan. 2013 yilda «Borussiya Dortmund» tarkibida «Bavariya» darvozasini ishg‘ol etgan bo‘lsada, yakunda uning jamoasi mag‘lubiyatini tan olgan. 2021 yilda «Manchester Siti» «Chelsi»ni (2:1), bu yil «Inter» «Milan»ni (1:0) mahv etganida, Ilkay mag‘lubiyatga uchragan jamoalar tomonida bo‘lgan.
5. O‘sha o‘yinda Manchesterdagi 7 mavsumda so‘nggi marta «shaharliklar» libosida maydonga tushdi. Ilkay 2022 yilda Fernandinyo o‘rniga jamoa sardori etib tayinlandi. Aslida, u Xosep Gvardiola davridagi dastlabki futbolchi. Ular hamkorlikda 14ta yirik sovrinlarni qo‘lga kiritishgan.
6. Gyundogan - 2004 yilda «Barsa»ga kelgan Dekudan keyin amaldagi ilk Yevropa chempioni.
7. Ilkay o‘z faoliyatida 3 nafar buyuk murabbiylar bilan hamkorlik qilgan: Yurgen Klopp (2011-2015 yillar, «Borussiya D.»), Tomas Tuxel (2015|2016, «Borussiya D.»), va Xosep Gvardiola (2016-2023 yillar, «Manchester Siti»). Endi esa u buyuk Xavi Ernandes bilan hamkorlik qiladi.
8. Gyundogan - ham «Manchester Siti»da, ham «Barsa»da to‘p surgan 13-futbolchiga aylanadi. Undan avval Serxio Aguero, Erik Garsiya va Ferran Torreslar mazkur duetning so‘nggi vakillari bo‘lishgandi. Ilkay shuningdek, «Borussiya D.» va «Barsa»da o‘ynagan 7-futbolchi bo‘ladi. Bundan tashqari, 2011 -2014 yillar oralig‘ida u Robert Levandovski bilan «Borussiya D.» sharafini himoya qilgan.
9. Ilkayning amakivachchasi Naz Aydemi - professional voleybolchi sifatida 2012 va 2021 yillarda Turkiya sharafini himoya qilgan.
10. Gyundogan saxovatpeshalik fazilati bilan ham mashhur. 2021 yilda u Germaniyadagi sel toshqinlaridan keyin ko‘chat ekish kampaniyasiga ehson qilgan. Keyin Turkiyadagi yong‘in asoratlarini bartaraf etishga mablag‘ ajratgan. Shuningdek, u ekologik barqarorlikni ta’minlash dasturini amalga oshirilishida mablag‘ to‘plashlari uchun bir qator shaxsiy buyumlari, kiyim-kechaklarini ehson qilgan. Xullas, germaniyalik turk o‘g‘loni qo‘li ochiq, serhimmat yigit!
D.ALIMOV tayyorladi
