Xabaringiz bor, "Navbahor" joriy mavsumda Osiyo Chempionlar Ligasi (OCHL) saralash bahsida ishtirok etadi va 22 avgust kuni safarda “Al-Vakra” (Qatar)ni mag‘lubiyatga uchratsa, OCHLning guruh bosqichiga yo‘l oladi hamda ushbu bosqich bahslari doirasida Namanganda ham o‘yinlar o‘tkazadi.
Shu munosabat bilan bugun “Navbahor” uy uchrashuvlarini o‘tkazadigan Namangan shahar, Davlatobod tumanidagi “Markaziy” stadioniga Osiyo Futbol konfederasiyasi (OFK)ning tijorat va translyasiya bo‘yicha ekslyuziv xamkori Football Marketing Asia (FMA) vakillaridan iborat delegasiya tashrif buyurdi.
Mazkur delegasiyaga hamyurtimiz Nigora Abidova rahbarlik qildi.
Delegasiya tarkibidan o‘zbekistonlik Azamat Umarov, turkmanistonlik Oraz Mamatgeldiyevlar ham joy olishgandi.
Delegasiya a’zolari “Navbahor” PFK hamda “Markaziy” stadioni ofislari, OAV xodimlari, VAR uchun ajratilgan, bundan tashqari, jamoalarning kiyim almashtirish xonalari, media tribuna, matbuot anjumani zali, VIP zal, “Markaziy” stadioni hududini ko‘zdan kechirishdi va bu boradagi OFK talablari, amalga oshiriladigan ishlar bo‘yicha o‘z maslahatlarini berishdi hamda “Al-Vakra” bilan bo‘ladigan o‘yinda “Navbahor”ga omad yor bo‘lib, jamoamiz OCHL guruh bosqichi yo‘llanmasini qo‘lga kiritishini tilashdi.
