"Manchester Yunayted" bosh murabbiyi Erik Ten Xagning aytishicha, himoyachi Garri Maguayr yozda jamoada qolish yoki ketishini hal qilishi kerak.

O‘tgan mavsumda "Manchester Yunayted"ning asosiy tarkibidagi o‘rnini yo‘qotgan Maguayr yaqinda sardorlik bog‘ichidan ayrildi.

O‘tgan haftada "MYU" Maguayrni sotib olish uchun "Vest Xem"ning 20 million funt sterlinglik taklifini rad etdi, ammo Ten Xag istasa, 30 yoshli ingliz futbolchisi bilan xayrlashishga tayyor.

"To‘g‘ri. Bu unga bog‘liq. "Manchester Yunayted"da bo‘lganingda, o‘z o‘rning uchun kurashishing, mahoratingni qo‘llashing va jamoaga eng mos va eng foydali ekanligingni isbotlashing kerak.

Sardorlikdan mahrum qilish? Garriga qarshi g‘arazligim yo‘q, bu jamoa manfaati uchun qilingan.

Keyingi qarorni u qabul qilishi kerak. Lekin Garri bu jamoaning bir qismi emas deb aytmayman. U o‘z o‘rni uchun kurashishi kerak.

U juda yaxshi markaziy himoyachi va men Garri Maguayrning salohiyatiga ishonaman. U faqat o‘zini ko‘rsatishi va asosiy tarkibga kirish uchun kurashishi kerak. Bu uning o‘ziga bog‘liq va menimcha, u buni uddalay oladi", - dedi Ten Xag ESPN bilan suhbatda.