Kuchli alam va dog‘ qoldirgan jarayon. Uels futboli afsonasi Rayyan Giggz 2021 yili oila ichida, ya’ni mahbubasiga kuch ishlatganlikda ayblangan edi.
Bu ish bo‘yicha sud muhokamalari naq 2 yil davom etdi va yakunda «MYU» afsonasi mutlaq oqlandi. Oddiy aytganda, Uels prokuraturasi jinoiy ishni batamom yopdi. Sudya Xilari Menli e’lon qilgan qaror - «Giggz kiritilgan shikoyatning barcha bandlari bo‘yicha aybsiz». Lekin ushbu mashmasha Uels faxri uchun qimmatga tushgani tayin. Zero, u ayblov ortidan mamlakat milliy jamoasi bosh murabbiyi lavozimidan ayrildi va Yevro-2020 hamda JCH-2022 final bosqichidan quruq qoldi. Qisqasi, ko‘p cho‘kindisi bor baxtli yakun...
Sobiq yarim himoyachining shaxsiy advokati Kris Dou sud qaroriga oddiy munosabat bildirdi: «Janob Giggz o‘z sha’nini tozalash yo‘lida olib borilgan 3 yillik kurash nihoyat, samarali yakunlanganidan xursand. U hozir chuqur yengillik his qilmoqda va endi hayotini ham, faoliyatini ham begunoh inson sifatida qayta tiklash niyatida». Eslatish kerak, 2020 yilning noyabr oyida Giggz mahbubasi Keyt Grevill bilan mojaro tufayli terma jamoa bosh murabbiyi lavozimidan chetlashtirilgandi. Ayblov bo‘yicha ko‘ngilsiz voqea aynan noyabr oyi boshida, Giggzning shaxsiy uyida sodir bo‘lgan. O‘shanda Keyt xonim polisiyaga shikoyat bilan qo‘ng‘iroq qilgach, Rayyanni so‘roq uchun mahkamaga olib ketishgan. To‘g‘ri, keyinchalik uni garov puli evaziga qo‘yib yuborishdi. Polisiyaning dastlabki ma’lumotiga ko‘ra, sobiq futbolchining mahbubasida yengil jarohat aniqlangan, ammo u shifoxonada yotishdan bosh tortgan.
2021 yilning aprel oyida prokuratura Giggzga nisbatan rasman ayblov e’lon qildi. Ammo u birinchi ayblovdan keskin farqlandi. Binobarin, Rayan nafaqat Keyt Grevill, balki uning singlisini ham kaltaklaganlikda ayblandi. Shuningdek, 2017 yil dekabr - 2020 yil noyabr oralig‘ida Keytga zug‘um o‘tkazib, uni majburan yonida olib qolganligi aytildi. Xullas, «MYU» afsonasiga real 5 yillik qamoq jazosi xavf soldi. O‘sha yili aprel oyidayoq ilk sud jarayoni bo‘ldi, lekin Giggz aybni tan olmadi. Natijada uni keyingi sud majlisigacha tajovuz jabrlanuvchilari sifatida ko‘rsatilgan ayollar bilan aloqa o‘rnatmaslik sharti bilan garov evaziga qo‘yib yuborishdi.
Ish 2022 yilning yozida yangi bosqichga ko‘tarildi. Xususan, Giggzni ayblagan prokuror Piter Rayt go‘yoki, 2020 yilning noyabr oyida sodir bo‘lgan voqeliklar haqida batafsil gapirdi. Uning ta’kidlashicha, Rayyan va Keyt o‘rtasidagi o‘ziga xos janjal sobiq futbolchining xiyonati tufayli yuzaga kelgan. Giggz tortishuvlardan biri payti mahbubasiga boshi bilan atayin zarba bergan, natijada uning labi shishgan, ko‘karish paydo bo‘lgan. Qolaversa, Rayyan o‘sha janjalda Keytning singlisini tirsagi bilan urgan. Krevill xonim esa bir necha kundan keyin ishni yanada chigallashtirdi: «Rayyan meni do‘stlarimdan ajratib qo‘ydi, hattoki, oilam vakillari bilan uchrashishimga ham to‘sqinlik qilib keldi». Giggz esa barcha ayblovlarni qat’iy ohangda rad etishda bardavom bo‘ldi. U jumladan, 2020 yilning noyabr oyida polisiya uyiga bostirib kirganida, juda qo‘rqib ketganini aytib, qamoq davrini hayotidagi eng yomon tajriba sifatida tilga oldi. Uels faxri hattoki, sud majlislaridan birida yig‘lab yubordi. Keyinchalik ishga aloqadorlar ishtirokida tor doirada sud muhokamasi boshlandi, ammo tomonlar yakunda murosa ko‘chasiga kirishgani yo‘q. Shu asnoda ayblov bo‘yicha yakuniy sud majlisi muddati belgilandi - 2023 yil 31 iyul. Endi bunga hojat yo‘q, Giggz nihoyat, yengil nafas ola boshladi.
Ayblov oqibatlari katta bo‘ldi. Deylik, 2018 yili Uels milliy jamoasi boshqaruvini qo‘lga olgan, keyingisida Yevro-2020 final bosqichi yo‘llanmasini ta’minlagan Giggz qit’a birinchiligida ishlash baxtidan ayrildi. Vaholanki, u o‘z mamlakati bosh jamoasini turnirga zo‘r ishtiyoq bilan tayyorlayotgandi. Ammo zo‘ravonlik ayblovi oqibatida Uels futbol assosiasiyasi katta bosim ostida qoldi va Giggz faoliyatini to‘xtatib turishdan o‘zga chora topolmadi. Uning o‘rnini esa Robert Peyj egalladi. Uelsliklar Yevro-2020dan keyin Peyj qo‘l ostida JCH-2022 yo‘llanmasini ham qo‘lga kiritishdi. Bu vaqtda Rayyan rasman bosh murabbiy bo‘lib qolaverdi, ammo jamoa bilan birga emasdi. UFA faqat 2022 yilning yoziga kelib Giggz bilan hamkorlik rasman to‘xtatilganini e’lon qildi. Bu qaror oddiy izohlandi: «Giggzga bog‘liq mojarolar milliy jamoaning jahon chempionatiga qaratilgan tayyorgarlik ishlariga ta’sir o‘tkazmasligi kerak». Mana, hammasi ortda qoldi. Uels afsonasining shaxsiy hayoti va faoliyati endi qanday rivojlanishini esa vaqt ko‘rsatadi, albatta.
Aytgancha, 2021 yilning aprel oyida Giggz APL «Shon-sharaf» zaliga kiritilishi kutilgandi. Biroq inglizlar so‘nggi pallada uning o‘rniga Tyerri Anrini tanlashdi. Mirror nashrida yozilishicha, Rayyan ushbu qarordan mutlaqo «shok» holatiga tushgan.
A.ABDUVALIXO‘JAYEV tayyorladi
