Pro liganing 13-turidan o‘rin olgan “Mash’al” — “Qo‘qon-1912” (0:1) uchrashuvidan so‘ng mezbonlar bosh murabbiyi Asror Aliqulov matbuot anjumanida ishtirok etdi.

– O‘yin haqida…

– Raqib jamoa qarshi hujumlarda xavfli edi. Uzun bo‘yga va yuqori tezlikka ega Anvar Xojimirzayev shu taktikaning bir bo‘lagi edi. Biz bunga qarshi tayyorgarlik ko‘rgandik. Afsuski, birinchi bo‘limda shunday holatda gol o‘tkazib yubordik. Ikkinchi bo‘limda hujumchisiz harakat qildik. Shu bois, kam sonli vaziyatlar yaratib, gol ura olmadik. “Qo‘qon-1912″dagi futbolchilarning tajribasi ham qo‘l keldi. Ko‘proq o‘zimizda ayb qidirishimiz kerak. Lekin ochko o‘ta muhim bo‘lgan o‘yinlarga saviyaliroq hakam tayinlanishi kerak.

– Hakamlardan norozimisiz…

– O‘yinda bu ko‘rinib turgandi. Muxlislar reaksiyasidan ham sezish mumkin. Shu bois bunday kurashuvchan jamoalar ishtirokidagi o‘yinlarga yaxshiroq hakam tayinlangan ma’qul. Men uning saviyasini baholamoqchi emasman. Lekin o‘z ishini qoyilmaqom bajardi, deya olmayman.

– Legionerlarning o‘yini sizni qoniqtirdimi?

– Ularda tanishuv jarayoni ketmoqda. Ular bundan ham yaxshiroq harakat qilishi mumkin.

– Jamoa oldiga qanday maqsad qo‘yilgan?

– Men o‘zimni yangi hisoblamayman, chunki “Mash’al” menga qadrdon jamoa hisoblanadi. Oldimizga Superligaga chiqish vazifasi qo‘yilgan. Homiylarga ham minnatdorchilik bildiramiz. Ular bizni qo‘llab-quvvatlayapti.