«Real» va «Chelsi» jamoalari darvozabon Kepa Arrisabalaga ijarasi bo‘yicha kelishuvga erishdi, deb xabar beradi Relevo jurnalisti Matteo Moretto.

Manbaga ko‘ra, Madrid klubi 28 yoshli ispaniyalikni sotib olish huquqisiz ijaraga oladi. Kelishuv keyingi bir necha soat ichida yopiladi.

Arrisabalaga «Real» darvozaboni Tibo Kurtuaning o‘rnini egallaydi. 10 avgust kuni belgiyalik futbolchining chap tizzasidagi oldingi xochsimon bog‘lami yirtilgani ma’lum bo‘ldi.

Oldinroq insayder Nikolo Skira «Chelsi» darvozaboniga «Bavariya»dan qiziqish borligi haqida xabar bergandi.

Ammo londonliklar sotib olish sharti bilan ijaraga olish variantida turib olgan myunxenliklarni rad etishdi.

2022/23 yilgi mavsumda Arrisabalaga «Chelsi» safida 39 ta o‘yinda maydonga tushib, 45 ta gol o‘tkazib yubordi va 12 marta o‘z darvozasi daxlsizligini saqlab qoldi.