Osiyo chempionlar ligasi saralash bahsi doirasidagi “Al-Vakra” – “Navbahor” (0:1) uchrashuvidan keyingi matbuot anjumanining birinchi qismida mezbonlar bosh murabbiyi Markes Lopes qatnashib, jurnalistlarning savollariga javob qaytardi.  

Quyida ispaniyalik mutaxassisning fikrlarini e’tiboringizga havola etyapmiz.

"Bugungi o‘yinning birinchi bo‘limida to‘pni biz nazorat qildik va shogirdlarim yaxshi o‘yin namoyish etishdi. Biroq jamoamizning yetakchi futbolchilaridan birining kutilmaganda jarohat olishi uchrashuvga biroz ta’sir o‘tkazdi.Keyinchalik bir o‘yinchimizning ikkinchi marta sariq kartochka olib, maydondan chetlatilishi vazifamizni yanada qiyinlashtirdi.

Biz o‘sha futbolchi, ya’ni, Xolid Yusuf Shurrabni almashtirmoqchi edik, lekin bunga vaqt yetmay qoldi.

Shunday bo‘lsa-da, shogirdlarim “ekstra-taymlar”ning birinchi 15 daqiqasida yaxshi harakat qilishdi. Lekin ta’kidlaganimdek, 10 kishi bo‘lib qolganimizdan so‘ng, “Navbahor” tashabbusni o‘z qo‘liga oldi va yagona gol uchrashuv taqdirini hal qildi.

Jamoamizda ham 2-3 ta xavfli vaziyatlar yuzaga keldi. Lekin biz ulardan foydalana olmadik.

“Navbahor”ni bugungi g‘alaba bilan tabriklayman va OCHLning guruh bahslarida ham jamoaga omad yor bo‘lishini tilayman!", — dedi Lopes.

“Navbahor” PFK matbuot xizmati.