Saudiya futboli oxir-oqibat, yevroarenadagi yana bir katta yulduz - Neymarni ham o‘z domiga tortdi.
Albatta, mislsiz to‘lov vositasida. Har holda, «Al-Hilol» braziliyalik hujumchi uchun barchasini muhayyo qilib qo‘ydi va u endi Ar-Riyodda chinakam sharqcha shohona hayot aro suzadi...
Turli manbalarda keltirilishicha, «Al-Hilol» Neymar transferi uchun «PSJ»ga 90 million yevro (bonuslar bilan 120 million) to‘laydi, braziliyalik futbolchining o‘zi esa mutlaq nodir shartnomaga ega bo‘ldi. Deylik, Sky Sports ma’lumotiga binoan, Neymar Saudiyada bir yillik o‘yini uchun 150 million yevro (kafolantangan maosh) oladi. Globo Esporte nashrida yozilishicha esa, maosh summasi biroz kattaroq: yiliga 160 mln. yevro. Bu oyiga 12,5 mln., kuniga 410 ming, soatiga 17,1 ming, daqiqasiga 285 yevrodan to‘g‘ri keladi.
Bundan tashqari, Neymar Saudiya Arabistonida ko‘z ko‘rib, quloq eshitmagan imtiyozlarga ega:
- Shaxsiy yumushlar va sayohat uchun xususiy samolyot
- To‘liq jihozlangan shohona qasr. Koshonada 25ta yotoqxona, 40x10 hajmdagi basseyn, 3ta sauna bor, yana 5 nafar xizmatkor biriktirilgan.
- Jami 8ta qimmatbaho avtomobil. Jumladan, Bentley Continental GT, Aston Martin DBX va Lamborghini Huraca~n. Qo‘shimchasiga, sutkasiga 24 soat xizmatda bo‘luvchi shaxsiy haydovchi
- Mutlaqo tekin mehmonxona, restoran va har qanday ko‘ngilochar tadbirlar xizmati (aniqrog‘i, bunday xarajatlarni klub ko‘taradi)
- Ijtimoiy tarmoqlarda Saudiya Arabistoni haqida qoldirilgan har bir post yoki surat uchun 500 ming yevro
- «Al-Hilol»ning har bir g‘alabasi uchun 80 ming yevro
- Saudiyada mahbubasi - Bruna Byankardi bilan nikohsiz yashashiga ruxsat
Tushunarliki, Yevropada biror klub Neymarni bunday imtiyozlar bilan siylay olmasdi. Qisqasi, u faoliyatini katta summada sotdi, juda katta summada.
Yana bir noyob shart. The Sun nashri ma’lumotiga ko‘ra, Neymar talablari ro‘yxatida yana bir g‘alati band bor - braziliyalik shohona uyidagi muzlatkichlarda sevimli ichimligi - asai sokining keti uzilmasligini so‘ragan. Asai - Braziliyada o‘suvchi palma turi. Sok shu daraxt mevasidan olinadi. Ney yana uyda hamisha guarani ichimligi bo‘lishini talab qilgan. Bunisi mehmonlari va do‘stlari uchun.
