Transfer yozining so‘nggi kunlarida "Bavariya" yarim himoyachi Skott Maktominay bilan shartnoma imzolashi mumkin. Jurnalist Tobi Altshafflning ijtimoiy tarmoqlarda xabar berishicha, Myunxen jamoasi hozirda bu o‘tishni qanday amalga oshirish mumkinligini sinab ko‘rmoqda.
Qayd etilishicha, 26 yoshli shotlandiyalik futbolchini o‘z jamoasida ko‘rishni Tomas Tuxel istamoqda.
Nufuzli transfermarkt portali ekspertlari Skott MakTominayni 25 million yevroga baholamoqda. Yarim himoyachi “Manchester Yunayted” akademiyasi bitiruvchisi hisoblanadi. U "Qizil iblislar"ning asosiy tarkibida 211 o‘yin o‘tkazib, 19 gol urgan va 5 golga assistentlik qilgan.