Grinvud yettita APLning sobiq yulduzlari bilan bir jamoada harakat qilishi mumkin. Buning uchun u "Beshiktosh" safiga o‘tishi kerak bo‘ladi. Turkiya klubi "MYU"dan haydalgan hujumchiga jiddiy qiziqish bildirayotgani aytilgan. Aslini olganda, "qizil iblislar" Grinvudni jamoaga qaytarmoqchi edi. Biroq, keng jamoatchilik bosimi ostida bu ish amalga oshmadi. Shuningdek, 21 yoshli futbolchiga o‘zga APL gigantlaridan ham qiziqishlar bo‘lgan. Afsuski, ular ham muxlislar tazyiqidan qochib, Grinvud variantidan voz kechdi.
Agarda Grinvud "Beshiktosh"ga o‘tishga rozilik bersa, u bir nechta sobiq APL yulduzlari orasiga kiradi. Ular ichida eng mashhuri va yangisi "Arsenal" va "Liverpul"da o‘ynagan Aleks Oksleyd-CHeymberlendir. Yarim himoyachi avgust avvalida erkin agent sifatida "Beshiktosh" bilan uch yillik bitimga imzo chekkandi. Shuningdek, bu jamoada Daniyel Amarti ham faoliyat yuritadi. Sobiq "Lester Siti" yulduzi shu yil avvalida APLni tark etgandi. U 2016 yildan beri 145 ta o‘yinda "Lester" sharafini himoya qilgan. Qolaversa, istanbulliklar safida yana bir "tulkilar" yulduzi Rashid Gezzal mavjud. U 2022 yilda "Lester"dan ketib, "Beshiktosh" bilan bitim tuzgan.
"Vest Xem Yunayted"ning sobiq futbolchisi Artur Masuaku ham hozir Turkiyada. U o‘tgan mavsumda "Beshiktosh"ga ijaraga berilgandi. Hozir u doimiy bitimga ega. Masuaku "bolg‘achilar" uchun o‘tmishda 128 marta maydonga tushirilgan. 29 yoshli himoyachi ishonchli vakillardan biriga aylandi.
"Everton" va "Kristal Pelas"dagi faoliyati bilan tanilgan Jenk Tosun ham "Beshiktosh" a’zosi sanaladi. Hujumchi to‘rt yil davomida APLda faoliyat yuritdi va yana eski jamoasiga qaytdi. Turkiya terma jamoasi a’zosi 4 mavsumda 10 ta gol urgan bo‘lsa, o‘tgan yili u "Beshiktosh" safida 18 ta golga mualliflik qilgandi. Shuningdek, Grinvud yana ikkita sobiq APL yulduzini ko‘rishi mumkin. Ular "Norvich" vakili Milot Rashisa hamda "Tottenxem"ning sobiq vakili Jedson Fernandeshdir. Ular ikki yil davomida jamoalarida muvaffaqiyatsizlikka uchrab, oxiri Turkiyaga kelishga majbur bo‘lganlardan.
ISMATOV J.
