“An-Nasr” hujumchisi Krishtianu Ronaldu 2023 yilgi “Oltin to‘p” sovrini uchun nomzodlar ro‘yxatiga kiritilmagan.
Portugaliyalik 20 yil ichida birinchi marta sovrin uchun da’vogarlar qatoridan o‘rin olmadi. Hujumchi oxirgi marta nomzodlar qatorida 2003 yilda bo‘lmagan, o‘shanda u 18 yoshda bo‘lgan va o‘zining "Manchester Yunayted"dagi ilk mavsumini o‘tkazgan.
Krishtianu Ronaldu faoliyati davomida besh marta (2008, 2013, 2014, 2016, 2017) “Oltin to‘p”ni qo‘lga kiritgan. U bu ko‘rsatkich bo‘yicha ikkinchi o‘rinni egallab turibdi, bu sovrinni ko‘proq olgan yagona - Lionel Messi (7 marta). Argentinalik futbolchi 2023 yilda nomzodlar ro‘yxatida bor va sovrin uchun asosiy da’vogarlardan biri sanaladi.
"Oltin to‘p" 1956 yildan beri berilib kelinmoqda. 2023 yilgi mukofot 30 oktyabr kuni Parijda (Fransiya) topshiriladi.
