“Ан-Наср” ҳужумчиси Криштиану Роналду 2023 йилги “Олтин тўп” соврини учун номзодлар рўйхатига киритилмаган.

Португалиялик 20 йил ичида биринчи марта соврин учун даъвогарлар қаторидан ўрин олмади. Ҳужумчи охирги марта номзодлар қаторида 2003 йилда бўлмаган, ўшанда у 18 ёшда бўлган ва ўзининг "Манчестер Юнайтед"даги илк мавсумини ўтказган.

Криштиану Роналду фаолияти давомида беш марта (2008, 2013, 2014, 2016, 2017) “Олтин тўп”ни қўлга киритган. У бу кўрсаткич бўйича иккинчи ўринни эгаллаб турибди, бу совринни кўпроқ олган ягона - Лионель Месси (7 марта). Аргентиналик футболчи 2023 йилда номзодлар рўйхатида бор ва соврин учун асосий даъвогарлардан бири саналади.

"Олтин тўп" 1956 йилдан бери берилиб келинмоқда. 2023 йилги мукофот 30 октябрь куни Парижда (Франция) топширилади.