Germaniya Superkubogi bellashuvi arafasida «RB Leypsig» yarim himoyachisi Dani Olmo yangi jamoadoshlari bilan maydondagi o‘zaro hamkorlikni yo‘lga qo‘yish haqida gapirgandi.

Keyin «Bavariya»ga qarshi bahsda xet-trikni amalga oshirdi va fantastik o‘yini bilan «Alyans-Arena» muxlislarining unini o‘chirdi.

Tabiiyki, Olmo Germaniya Superkubogining asosiy qahramoni bo‘lib, Myunxenga kelishi bilan sovrindor bo‘lishni orzu qilgan Xarri Keynni xafa qilgan bo‘lsa, ajabmas. Biroq «Bavariya»ni o‘z uyida emin-erkin to‘p surishiga imkon bermagan yolg‘iz u emas. Maydonga o‘zgacha shijoat bilan tushgan «novvoslar» chempionning har bir xatosidan unumli foydalanib, mezbonlarga o‘yin berishmadi.

Jamoa anchadan beri jadal rivojlanayotgan bo‘lsada, mavsum arafasida Yoshko Gvardiol, Kristofer Nkunku va Dominik Soboslaidan judo bo‘ldi. Ularning APL klublaridan joy olishgani esa bu nafaqat jamoa, balki Bundesliga miqyosidagi ulkan yo‘qotish ekanligini anglatadi. Ha, «Leypsig» muhim ijrochilarini yo‘qotdi, lekin Olmo qoldi. Aynan shu ispaniyalik futbolchi jamoadoshlarini tarkibning saviyasiga putur yetmaganligiga ishontirdi, ularning ruhiyatini ko‘tardi. «Lans»dan o‘tgan Lois Openda ilk kundan boshlab yaxshi taassurot qoldirdi. Nikolas Zeyveld va Benyamin Sheshko qardosh «RB Zalsburg»dan kelishdi, Xavi Simons «PSJ»dan, Fabio Karvalyu «Liverpul»dan ijaraga olindi.

Germaniyadagilarning ko‘pchiligi «RB Leypsig»ni yoqtirmaydilar, u amalga oshirayotgan manfaatli transferlar va shiddatli rivojlanish boshqalarning hasadini qo‘zg‘aydi. Lekin buning asosiy sababchisi bo‘lmish klub falsafasini tan olish va o‘rganishni istamaydilar. «Bavariya»ning sobiq hujumchisi Mario Gomes hozir «Red Bull Sokker»ning texnik direktori sifatida San-Paulu, Nyu-York va Leypsigdagi klublarga har tomonlama yordam beradi. Gomes qanday yumushlar bilan mashg‘ul? «Avvalo, biz o‘z aqidalarimizga rioya qilayotganimizga amin bo‘lishimiz lozim. Ikkita jamoaga duch kelganda, ularning qay biri «Red Bull»ga tegishli ekanligini aniqlay olishimiz kerak. Aynan shu asnoda o‘yinchilarni tanlab olamiz», - deydi Gomes. Iyun oyida San-Pauluda «RB Bragantino» klubi Marioning ko‘z o‘ngida mahalliy grand - «Flamengo» darvozasiga 4ta javobsiz gol urgandi: «RB» mukammal o‘yin ko‘rsatdi, biz yuqori pressing bilan raqibni qisib qo‘ydik. Bunday o‘yinni kutmagan raqib faqat olis uzatmalar bilan to‘p surdi. Bu o‘yin bizning to‘g‘ri yo‘lda ekanligimizni isbotladi».

Jamoa Myunxendagi Superkubok bahsida ham ustunligini namoyish etdi. Yuqori sur’at va hujumkorlik «Bavariya» uchun kutilmagan sinov bo‘ldi. «Mavsum startida biz qay tariqa «Bavariya»dek grandga jiddiy muammo yaratishimiz haqida gapirish qiyin. Lekin bio‘ o‘z uslubimizni yaratishga urinib ko‘ramiz. Uni albatta topishimiz kerak», - deydi Mario.

«Bavariya» va «Borussiya Dortmund» nemis futbolining uzoq yillik gegemonlari. Myunxen grandi qatorasiga 12-chempionlikka erishish niyatida. O‘tgan mavsumda bir qator qiyinchilikka duch kelgan bo‘lsada, baribir, liganing yetakchisi ekanligini isbotladi. Lekin «rekordmaystr» futbolchilari o‘rtasida o‘yin uslubiga oid ayrim tushunmovchiliklar ham yo‘q emas. Mana shu omil ularga qarshi bahsda muhim rol o‘ynashi mumkin. «RB Leypsig» - tarkibi muntazam ravishda o‘zgarib turadigan jamoa. Yevropaning badavlat klublari bo‘lajak yulduzlarni aynan shu jamoadan xarid qilishadi. Biroq klubdagi vaziyat doimo barqaror qolaveradi. Opendaga o‘xshagan o‘yinchilar ilk kundan boshlab o‘zlarini yangi tizimda erkin his etadilar.

«U bir necha oylar, ehtimol, yillardan beri skautlar e’tiborida turgandi. O‘tgan mavsumda esa ajoyib o‘yinlarni namoyish etdi. dunyoda saviyali o‘yinchilar juda ko‘p. Faqat biz ular orasidan falsafamizga mos keladiganlarini ko‘ra olishimiz lozim», - deydi Gomes.

«Bavariya»ni faqat bitta o‘yinda emas, balki 34ta bellashuv natijasiga ko‘ra mahv etish uchun shuning o‘zi yetarlimi?

«Ochig‘ini aytganda, ular mavsumni yuksak darajada o‘tkaza olsalar, bizda imkoniyatlar qolmaydi. Bizning asosiy g‘oyamiz - doimo ular bilan yonma-yon bo‘lish. Agar «Bavariya» qandaydir muammoga duch kelsa, «Dortmund» yoki biz undan foydalanishimiz lozim», - dedi Mario.

Olmo ham aynan shunday fikrda: «Jamoada qolishimning asosiy sababi ham shu. Maqsadim - parvozni davom ettirish. Mavsumni muvaffaqiyatli boshlash muhim ahamiyatga ega. Shuningdek, yil davomida barqarorlikni ta’minlash ham».

Klubda qanday o‘zgarishlar yuz berishidan qat’iy nazar, «RB Leypsig» barqarorlikni saqlab qolishga qodir ekanligini isbotlamoqda.

MUHAMMADSODIQ tayyorladi