Xavining fikricha, Vitor Roke qishda "Barselona"ga keladi.
“Hozir sport rahbariyati va Deku menga Roke yanvarda transfer qilinishini aytishmoqda. Ko‘ramiz, lekin hech qanday muammo bo‘lmasligi kerak. Keling, vaziyat qanday bo‘lishini ko‘ramiz”, - dedi “Barselona” bosh murabbiyi.
Iyul oyida Kataloniya klubi "Atletiko Paranaense" bilan 18 yoshli forvardning 2024 yilning yozida transferi borasida kelishib olganini e’lon qilgandi.
Avvaliga "Barselona" Roke uchun 35+10 million yevro to‘lashi xabar qilingandi. Keyin kataloniyaliklar belgilangan to‘lovni 35 dan 30 million yevroga kamaytirmoqchi ekani haqida ma’lumot paydo bo‘ldi. Shundan so‘ng, "Atletiko Paranaense" "Barsa"ga ultimatum qo‘ydi: klubga imzolangan hujjatlarni yuborish uchun 24 soat vaqt berildi.
Klublar transfer bo‘yicha yakuniy kelishuvga 8 iyul kuni erishgan. "Barsa" Vitor uchun 30+31 million yevro to‘laydi - bu dastlab rejalashtirilganidan ko‘proq.
Braziliyalik futbolchi 2022/23 yilgi mavsumda “Atletiko Paranaense” safida 41 o‘yinda maydonga tushib, 20 gol va 8 golga assistentlik qilgan.
