Kecha Osiyo Chempionlar ligasining yangi mavsumi start oldi. Unda uchta jamoalarimiz uch xil natija qayd etishdi.

Ya’ni, OKMK safarda “Al-Ittihod”ga 0:3 hisobida yutqazdi. “Nasaf” Iordaniyada “Al-Faysaliy”ni 1:0 hisobida taslim qilgan bo‘lsa, “Navbahor” Saudiya Arabistonida “Al-Hilol” bilan sensasion tarzda 1:1 hisobida durang natijani qayd etdi.

Shu o‘rinda “Andijon” klubi bosh direktori Ulug‘bek Mirzayev yuqoridagi natijalar yuzasidan o‘z fikrlarini bildirib o‘tdi.

“Avvalambor, “Nasaf” jamoasini g‘alaba bilan tabriklaymiz. Shuningdek, “Navbahor”ni va uning muxlislarini durang natija bilan qutlaymiz. Chempionatimizning navbatdagi tur uchrashuvida “Navbahor” jamoasi Andijonga tashrif buyuradi. Bu nihoyatda qiziqarli o‘yin bo‘ladi. Ayniqsa, “Al-Hilol”ga qarshi durangdan keyin muxlislar tomonidan “Andijon” – “Navbahor” uchrashuviga muxlislarning qiziqishi yanada ortishi shubhasiz. Bo‘lajak o‘yinda ishqibozlarning tashrifi juda ko‘p bo‘ladi, deb o‘ylaymiz. Mazkur bahsga astoydil tayyorlanyapmiz.

OKMK jamoasi esa yaxshi start ololmadi. Ammo, o‘ylaymizki, oldinda yana beshta o‘yin bor. OKMK ham o‘zi uchun kerakli natijalarni qo‘lga kiritishiga tilakdoshmiz.

Yana shuni aytib o‘tmoqchimizki, bu yil “Andijon” “Nasaf”ga qarshi bahslarda 4 ochkoni oldi. “Nasaf” esa “Andijon”dan faqat bir ochkoni qo‘lga kirita oldi. Ya’ni, “Andijon” jamoasi ham ko‘rinib turibdiki, “Nasaf”ning xalqaro arenada Iordaniyada g‘alaba qozongani jarayonida demak, biz jamoamizni bu yil yomon shakllantirmadik. Bemalol Superligada yetakchi klublarga raqobat ko‘rsata olyapmiz. Buni muxlislarimiz, jamoamiz homiylari hamda hamkorlari ham “Nasaf”ning kechagi g‘alabasidan so‘ng yana bir bor “Andijon”ning natijalari naqadar jiddiyligini yaxshi baholashadi”, - deya fikr bildirib o‘tdi Ulug‘bek Mirzayev.

“Andijon” matbuot xizmati.