Oktyabr oyida O‘zbekistonga tunislik taniqli sobiq futbolchi Shaker Zuagi tashrif buyuradi.

U oxirgi marta Tunisning eng nomdor jamoalaridan biri “Etual De Sahel”da bosh murabbiy yordamchisi bo‘lib ishladi. Hatto bosh murabbiy vazifasini bajaruvchi bo‘lib ham faoliyat olib borgan.

Muxlislarimiz uni yurtimizda OKMK va “Bunyodkor”dagi o‘yinlari orqali yaxshi eslab qolishgan. U kuchli markaziy yarim himoyachiligini isbotlay olgan. Shu sababli Zuagi futbol muxlislarida o‘zidan juda yaxshi taassurotlar qoldira olgan.

Tez orada Shaker O‘zbekistonga keladi va shundan foydalangan holda u “Andijon”ning uy uchrashuvlaridan biriga taklif qilindi.

Hozirgi kunda juda yaxshi futbol eksperti sifatida ham tilga olinmoqda. Shuning uchun “Andijon”ning o‘yinlarini kuzatgan holda kuchaytirilishi lozim bo‘lgan pozisiyalarni baholaydi va o‘z fikrlarini bildiradi.

Aytish mumkinki, “Andijon” klubi bosh direktori Ulug‘bek Mirzayev Shaker Zuagi bilan yaxshi aloqada bo‘lib, garchi tunislik yurtimizdan ketganiga ancha bo‘lganiga qaramay, ular doimiy aloqada bo‘lib turadilar.

Ma’lumot uchun, Zuagi O‘zbekistondan ketgach, BAAning “Xorfakkan” jamoasida ishladi. Darvoqe, uning akasi Tunisdagi eng taniqli murabbiylardan hisoblanadi.

Tabiiyki, Zuagining jamoamiz to‘g‘risidagi fikrlari yangi mavsumga shakllantirish jarayonida juda ahamiyatli bo‘ladi. Shuning uchun kelasi mavsumda klubni shakllantirish jarayonida tunislik mutaxassisning xulosalari jamoamizga asqotadi, degan umiddamiz.

“Andijon” matbuot xizmati.