Октябрь ойида Ўзбекистонга тунислик таниқли собиқ футболчи Шакер Зуаги ташриф буюради.

У охирги марта Туниснинг энг номдор жамоаларидан бири “Этуал Де Саҳел”да бош мураббий ёрдамчиси бўлиб ишлади. Ҳатто бош мураббий вазифасини бажарувчи бўлиб ҳам фаолият олиб борган.

Мухлисларимиз уни юртимизда ОКМК ва “Бунёдкор”даги ўйинлари орқали яхши эслаб қолишган. У кучли марказий ярим ҳимоячилигини исботлай олган. Шу сабабли Зуаги футбол мухлисларида ўзидан жуда яхши таассуротлар қолдира олган.

Тез орада Шакер Ўзбекистонга келади ва шундан фойдаланган ҳолда у “Андижон”нинг уй учрашувларидан бирига таклиф қилинди.

Ҳозирги кунда жуда яхши футбол эксперти сифатида ҳам тилга олинмоқда. Шунинг учун “Андижон”нинг ўйинларини кузатган ҳолда кучайтирилиши лозим бўлган позицияларни баҳолайди ва ўз фикрларини билдиради.

Айтиш мумкинки, “Андижон” клуби бош директори Улуғбек Мирзаев Шакер Зуаги билан яхши алоқада бўлиб, гарчи тунислик юртимиздан кетганига анча бўлганига қарамай, улар доимий алоқада бўлиб турадилар.

Маълумот учун, Зуаги Ўзбекистондан кетгач, БААнинг “Хорфаккан” жамоасида ишлади. Дарвоқе, унинг акаси Тунисдаги энг таниқли мураббийлардан ҳисобланади.

Табиийки, Зуагининг жамоамиз тўғрисидаги фикрлари янги мавсумга шакллантириш жараёнида жуда аҳамиятли бўлади. Шунинг учун келаси мавсумда клубни шакллантириш жараёнида тунислик мутахассиснинг хулосалари жамоамизга асқотади, деган умиддамиз.

“Андижон” матбуот хизмати.