«Brayton» o‘z yetakchilaridan biri, yaponiyalik yarim himoyachi Kaoru Mitomaning APLda avgust oyi laureati bo‘lishini ta’minlash uchun kutilmagan yurishni o‘ylab topdi.
Ya’ni klub mashhur xonanda Teylor Svift shinavandalariga alohida murojaat yo‘lladi. Ha, yakunda Mitoma emas, balki «Tottenxem» vakili Jeyms Meddison oy laureati sifatida e’tirof etildi, lekin «Brayton» harakati e’tiborga molik, baribir.
Ayyorona yurish
«Brayton»ning ijtimoiy tarmoqlardagi sahifalariga qo‘yilgan murojaatda Teylor Svift alohida tilga olindi: «Mitoma - Teylor Sviftning katta muxlisi. Buni bilarmidinglar? Shu yigit APLda oyning eng yaxshi futbolchisi bo‘lish uchun kurashmoqda. Shuningdek, uning goli avgustda eng chiroylisi sifatida tan olinishi mumkin. Bunga befarq qaramasangiz, ovoz bering!»
Qiziqarli kurash
Kaoru Mitoma avgust taqvimidan o‘rin olgan APL doirasidagi 4ta o‘yinda 1ta gol urdi va 3ta assist muallifiga aylandi. Umuman, «Oyning eng yaxshi futbolchisi» nominasiyasida Mitomaga Meddisondan tashqari, Rodri («Manchester Siti»), Brayan Mbemo («Brentford»), Jarrod Bouen («Vest Xem») va Tayvo Avoniyi («Nottingem») ham raqobat ko‘rsatishdi.
Jiddiy raqiblardan ustunlik
«Oyning eng chiroyli goli» nominasiyasiga kelsak, so‘rovga yaponiyalik legioner qatori Bukayo Saka («Arsenal»), Aleksander Isak («Nyukasl»), Jarrod Bouen («Vest Xem»), Gustavo Xamer («Sheffild Yunayted»), Rahim Sterling («Chelsi»), Kevin Shade («Brentford») va Luis Dias («Liverpul») nomzodi qo‘yilgandi. Yakunda aynan qit’adoshimiz goliga ko‘proq ovoz berildi.
Aralashuv
Qiziq, «Brayton»ning murojaati mohiyati nima? Gap shundaki, taniqli xonandaning muxlislari oldinroq Golden Boy (dunyoning eng yaxshi yosh futbolchisi) so‘roviga jiddiy ta’sir ko‘rsatishgandi. Ya’ni nomzodlardan biri, «Barselona» vakili Aleks Balde amerikalik xonanda qo‘shiqlarini uncha yoqtirmasligini aytgach, uning shinavandalari qattiq ranjishdi. Ular bunga javoban hattoki, Golden Boy sovrini uchun kurashda Baldening asosiy raqibi sanalgan Jud Bellingem («Real»)ga faol tarzda ovoz bera boshladilar. Shu tariqa angliyalik futbolchining so‘rovda g‘alaba qozonish imkoniyati 30 foizdan 88,8 foizga ko‘tarilib ketdi. Tabiiyki, «Brayton» Mitomani qo‘llab-quvvatlash aksiyasida ayni shu holatni o‘ylagan, albatta.
«Brayton» rahbariyati Kaoru Mitomaga Porsche avtomobilini sovg‘a qildi - APLda oy laureati bo‘lishi sharafiga. Biroq so‘rov boshqacha natija bilan yakunlandi. Ayrim manbalarda keltirilishicha, yaponiyalik futbolchi shundan so‘ng qimmatbaho sovg‘ani qaytarib berdi.
