Osiyo O‘yinlarining baydarka va kanoeda eshkak eshish sektorida bugun 6 ta final bahslari rejalashtirilgan. Ularning uchinchisida kanoeda 1000 metrga erkaklar o‘rtasida juftlik bahsi bo‘lib o‘tdi.

Hamyurtlarimiz Shohmurod Xolmurodov va Nurislom To‘xtasin o‘g‘li juftligi startni biroz sekinroq boshlagan bo‘lsalar-da, ular finishda ta’qibchilarni katta farq bilan ortda qoldirishdi. Qozog‘istonliklar hamyurtlarimizdan naq 6 soniya ortda qolib ketishdi. Uchinchi o‘rin esa Hindistonga nasib etdi.

Shu tariqa, O‘zbekiston delegasiyasi hisobidagi medallar soni 45 taga yetdi — 13 oltin, 14 kumush va 18 bronza.