Osiyo O‘yinlarida bugungi ikkinchi oltin medal o‘z hisobimizga qo‘shildi. Yengil atletikaning ayollar o‘rtasida uchhatlab sakrash bahslarida Sharifa Davronova eng yaxshi natijani qayd etdi.

17 yoshli hamyurtimizning 6 ta urinishidan ikkitasi muvaffaqiyatli bo‘ldi. U ilk urinishda 13,98 metrga sakragan bo‘lsa, ikkinchi urinishda 14,09 metrni zabt etib, shaxsiy rekordini yangiladi.

Shaxsiy rekordi Davronovanikiga nisbatan yaxshiroq bo‘lgan boshqa mahoratli sportchilar esa Sharifadan yaxshiroq natija qayd eta olishmadi. Ikkinchi pog‘onani xitoylik Rui Jeng (13,92) egallagan bo‘lsa, bronza medali yaponiyalik Mariko Morimotoga nasib etdi (13,78).

Shu tariqa, delegasiyamiz hisobidagi medallar soni 53 taga yetdi — 16 oltin, 15 kumush va 22 bronza. Hamon 5-pog‘onadamiz. Hindiston hisobida ham 16 ta oltin bor, ammo ularning kumushlari soni — 29 ta.