Осиё Ўйинларида бугунги иккинчи олтин медаль ўз ҳисобимизга қўшилди. Енгил атлетиканинг аёллар ўртасида учҳатлаб сакраш баҳсларида Шарифа Давронова энг яхши натижани қайд этди.

17 ёшли ҳамюртимизнинг 6 та уринишидан иккитаси муваффақиятли бўлди. У илк уринишда 13,98 метрга сакраган бўлса, иккинчи уринишда 14,09 метрни забт этиб, шахсий рекордини янгилади.

Шахсий рекорди Давронованикига нисбатан яхшироқ бўлган бошқа маҳоратли спортчилар эса Шарифадан яхшироқ натижа қайд эта олишмади. Иккинчи поғонани хитойлик Руи Женг (13,92) эгаллаган бўлса, бронза медали япониялик Марико Моримотога насиб этди (13,78).

Шу тариқа, делегациямиз ҳисобидаги медаллар сони 53 тага етди — 16 олтин, 15 кумуш ва 22 бронза. Ҳамон 5-поғонадамиз. Ҳиндистон ҳисобида ҳам 16 та олтин бор, аммо уларнинг кумушлари сони — 29 та.