Ma’lumki, 8 oktbyar kuni “Andijon” o‘z uyida “Paxtakor”ni qabul qiladi. Bo‘lajak muhim bellashuv barchada katta qiziqish uyg‘otmoqda.

“Burgutlar”ning “Sherlar”ga qarshi o‘yinini ashaddiy muxlislar ham intiqlik bilan kutmoqdalar.

“Andijon”ning iqtidorli yarim himoyachilaridan biri, golli uzatmalarni oshirish bo‘yicha ancha malakali hisoblangan Sardor Azimov “Paxtakor”ga qarshi bahs oldidan “Andijon” matbuot xizmatiga qisqacha intervyu berdi.

- "Andijon"ni "Paxtakor"ga qarshi muhim o‘yin kutmoqda. Uchrashuv oldidan nimalarni his qilyapsiz?

- Kuchli ishtiyoq bilan tayyorgarlik ko‘ryapmiz. Nasib qilsa, “Paxtakor” bilan o‘yinda yaxshi natijaga erishamiz, albatta muxlislar yordamida.

- Birinchi davrada bu jamoalar o‘rtasida durang qayd etilgan uchrashuvda maydonga tusha olmagandingiz. Ayni paytda o‘zingizni qanchalik tayyorlayapsiz va nimaning evaziga motivasiyangiz oshyapti?

- Sir emaski, “Paxtakor” chempion jamoa. Albatta, har bir klub “Paxtakor”ga qarshi juda kuchli ishtiyoq bilan tayyorlanadi. Chunki O‘zbekiston terma jamoasi o‘zagi “Paxtakor” futbolchilaridan iborat. Motivasiyani muxlislardan olamiz. Jamoamizni o‘zimizning stadionda “bomba” tarzda qo‘llab-quvvatlashini his qilamiz.

- "Paxtakor"ning OCHL doirasida safarda "Al Fayha" jamoasiga qarshi o‘yinini ko‘rdingizmi? Qanday taassurot qoldirdi?

- Ha, ko‘rdim. “Paxtakor” mag‘lubiyatga loyiq o‘yin namoyish etmadi. Shunchaki, omad yetishmadi. Agar vaziyatlardan birortasini golga aylantirganlarida menimcha, “Paxtakor” yutqazmasdi.

- Muxlislar sizdan Xebayga yana golli uzatmalaringizni kutishyapti...

- Albatta, o‘zim ham juda xohlayapman. Nasib bo‘lsa, Xebay bu yil to‘purar bo‘ladi. Hozirda uning bu boradagi imkoniyati yuqori.