Маълумки, 8 октбярь куни “Андижон” ўз уйида “Пахтакор”ни қабул қилади. Бўлажак муҳим беллашув барчада катта қизиқиш уйғотмоқда.
“Бургутлар”нинг “Шерлар”га қарши ўйинини ашаддий мухлислар ҳам интиқлик билан кутмоқдалар.
“Андижон”нинг иқтидорли ярим ҳимоячиларидан бири, голли узатмаларни ошириш бўйича анча малакали ҳисобланган Сардор Азимов “Пахтакор”га қарши баҳс олдидан “Андижон” матбуот хизматига қисқача интервью берди.
- "Андижон"ни "Пахтакор"га қарши муҳим ўйин кутмоқда. Учрашув олдидан нималарни ҳис қиляпсиз?
- Кучли иштиёқ билан тайёргарлик кўряпмиз. Насиб қилса, “Пахтакор” билан ўйинда яхши натижага эришамиз, албатта мухлислар ёрдамида.
- Биринчи даврада бу жамоалар ўртасида дуранг қайд этилган учрашувда майдонга туша олмагандингиз. Айни пайтда ўзингизни қанчалик тайёрлаяпсиз ва ниманинг эвазига мотивациянгиз ошяпти?
- Сир эмаски, “Пахтакор” чемпион жамоа. Албатта, ҳар бир клуб “Пахтакор”га қарши жуда кучли иштиёқ билан тайёрланади. Чунки Ўзбекистон терма жамоаси ўзаги “Пахтакор” футболчиларидан иборат. Мотивацияни мухлислардан оламиз. Жамоамизни ўзимизнинг стадионда “бомба” тарзда қўллаб-қувватлашини ҳис қиламиз.
- "Пахтакор"нинг ОЧЛ доирасида сафарда "Ал Файҳа" жамоасига қарши ўйинини кўрдингизми? Қандай таассурот қолдирди?
- Ҳа, кўрдим. “Пахтакор” мағлубиятга лойиқ ўйин намойиш этмади. Шунчаки, омад етишмади. Агар вазиятлардан бирортасини голга айлантирганларида менимча, “Пахтакор” ютқазмасди.
- Мухлислар сиздан Хебайга яна голли узатмаларингизни кутишяпти...
- Албатта, ўзим ҳам жуда хоҳлаяпман. Насиб бўлса, Хебай бу йил тўпурар бўлади. Ҳозирда унинг бу борадаги имконияти юқори.
