O‘zbekiston hamda Ispaniya o‘rtasidagi uchrashuv yakunlanganidan so‘ng jamoalar ishtirokida matbuot anjumani o‘tkazildi.

O‘zbekiston U-23 terma jamoasi bosh murabbiyi Timur Kapadze:

— Uchrashuv ikkala jamoa uchun foydali bo‘ldi. Natija durang bo‘lsa-da, futbolchilarning o‘yinidan qoniqdim.

Yaratilgan vaziyatlarni golga aylantirish ustida ko‘proq ishlashimiz kerak. Saidazamat Mirsaidovning jarohati jiddiy emas deb umid qilaman. Ushbu yig‘inda ishtirok etgan barcha futbolchilarga imkoniyat beriladi.

Men uchun tarkibdagi barcha futbolchilar eng zo‘rlari. Ular bilan faxrlanaman.

Umarali Rahmonaliyev:

— Yaxshi o‘yin ko‘rsatdik deb o‘ylayman. Uchrashuvdan avval raqibni to‘liq o‘rgandik. Maydonda murabbiylar bergan ko‘rsatmalarni bajarishga harakat qildik. Ispaniya maydon markazida mukammal o‘yin ko‘rsatuvchi futbolchilarga ega. Ushbu bahs shuni ko‘rsatdiki, har qanday raqibga qarshi o‘ynay olamiz.

Terma jamoa bizning yuzimiz. Har bir o‘yinga ikki yuz foiz tayyorgarlik ko‘rishimiz shart.