Ispaniya terma jamoasi Norvegiyani mag‘lub etib, Yevropa chempionati yo‘llanmasini qo‘lga kiritdi.
Luis de la Fuente shogirdlari Norvegiyaga qarshi Yevro-2024 saralashining 6-turi doirasidagi mehmonda minimal hisobda g‘alaba qozondi. “Qizil furiya”ning yagona goli 49-daqiqada Gavi tomonidan kiritildi.
Opta xabariga ko‘ra, ispanlar 2017 yilning noyabridan beri birinchi marta ketma-ket uchta o‘yinda birorta ham gol o‘tkazib yubormasdan g‘alaba qozonishga muvaffaq bo‘lishdi. O‘shanda Xulen Lopetegi jamoani boshqargan va "quruq" g‘alabalar seriyasi oxir-oqibat beshtaga yetgan.
Eslatib o‘tamiz, avvalroq Ispaniya Shotlandiya termasini (2:0), Kiprni (6:0) mag‘lub etgandi.
