Supeligada yuzaga kelgan tanaffusda "Neftchi" navbatdagi o‘rtoqlik uchrashuvini "Istiqlol" markaziy o‘yingohida tashkil etdi. Jamoaning kechagi raqibi qo‘shni Qirg‘iz Respublikasi Oliy divizioni chempionatida karvonboshilik qilib kelayotgan O‘sh shahrining "Alay" klubi bo‘ldi.
Birinchi bo‘limga to‘xtaladigan bo‘lsak, har ikki jamoa vakillari bir qancha hujumlarni tashkil etishgan bo‘lsada, deyarli xavfli vaziyat yaratilmadi va tanaffusga jamoalar nursiz durang 0:0 hisobida chiqib ketishdi.
Asosiy voqealar rivoji ikkinchi bo‘limda sodir etildi. Bachana Arabuli o‘rniga almashtirilgan Bilolxon Toshmirzayev o‘yinga joziba kiritdi va aynan uning ajoyib uzatmasidan so‘ng mehmonlar darvozasini Giorgi Nikabadze chiroyli tarzda ishg‘ol etishga muvaffaq bo‘ldi 1:0. Bir necha daqiqa o‘tgach navbatdagi kombinasion hujumda farg‘onaliklarning gruziyalik legioneri hisobni oshirishga yaqin edi. Ammo, uning yo‘llagan zarbasi darvoza to‘siniga tegib qaytdi. Bu vaziyatda Giorgiga biroz omad yetishmay qoldi. Uchrashuv "yo‘lbarslar" ustunligida o‘tayotgan bir paytda mehmonlarning kam sonli qarshi hujumlaridan biri gol bilan yakun topdi. Bu vaziyatda o‘ng qanotdan jarima maydonchasi ichiga katta tezlikda kirib kelgan Shohruh Muratov darvozani aniq nishonga olib, hisobni tenglashtirishga erishdi 1:1. Bu hisob uchrashuv oxiriga qadar o‘zgarmadi.
XALQARO O‘RTOQLIK O‘YINI
Farg‘ona sh. "Istiqlol" stadioni
"Neftchi" (Farg‘ona) 1-1 "Alay" (Osh, Qirg‘iz Respublikasi)
Gollar: Georgiy Nikabadze 54 1:0, Shoxrux Muratov 75 1:1.
Hakamlar: Olim To‘ychiboyev,SHohruhA’zamov, Azizbek Isoqov.
