"Real" yarim himoyachisi Arda Gyulerning bolalikdagi murabbiyi Erol Tokgyozler o‘z shogirdi haqida fikr bildirib o‘tdi.

«Ardaning kumiri Aleks de Souza edi. Shuning uchun u hamisha 10-raqamda o‘ynashni istardi. U futbol haqida sutkasiga 24 soat, haftasiga 7 kun o‘ylaydi.

U maktabda o‘qiayotganida — 13 yosh paytida Arda bilan tanishganman. U «Genchlerbirligi»ga kelgan paytda uning jismoniy tarbiya o‘qituvchisi va murabbiyi bo‘lganman. Gyuler bilan avvalroq ishlagan hamkasblarimdan biri menga uning noyob iqtidor egasi ekanini aytgandi. Ardaning salohiyati Messinikidan yuqori.

Biz ilk marta ko‘rishganimizda uning bo‘yi 155 sm.dan past edi, ammo yuqori texnikaga ega edi. U to‘p bilan oyoqda istalgan ishni qila oladi. Uning noyob iqtidori sezilib turardi. Bu yoshda shunday iqtidorga ega futbolchini shu paytgacha ko‘rmaganman. Arda Ispaniyada o‘yinlarda ishtirok eta boshlasa, uning texnikasiga barcha guvoh bo‘ladi.

Maydonning qaysi joyida bo‘lishidan qat’i nazar unda har bir vaziyat uchun ikki, uch, to‘rt yoki beshta turlicha rejasi bo‘lishi mumkin. U aql bilan harakat qiladi. Himoyachilar uni qanday qilib to‘xtatish mumkinligini bilishmasdi.

U o‘zi o‘ylagan barcha ishni qila oladi. Undan nima kutish mumkinligini esa oldindan aytib bo‘lmaydi. Dribling, zarbalar... Aql bovar qilmaydi», — dedi Tokgyozler.